«Марий улмем — ойыртемалтше сынем»
Марий улмем дене кугешнем. Тиде мыйын ойыртемалтше сынем», – манеш одо кундемыште илыше марий ӱдыр Светлана Котлова.
Шукерте огыл Светлана «Мисс России» конкурсышто шке мастарлыкшым терген да марий улмыж нерген уло тӱнялан палдарен.
Светлана Одо кундем Каракулин районысо Быргынды ялыште шочын. Туштак ача-аваже илат. Еш шуко шочшан лийын. С.Котлован кок шольыжо да ик шӱжарже уло. Быргынды школышто латик классым пытарымеке, Удмурт кугыжаныш университетын медицине биотехнологоий факультетыштыже «Иммунолог» специальностьым налын. Специальность шуэн вашлиялтше, паша верым муаш неле лийын, сандене теҥгечысе студентлан ик производствыш инженер-технологлан паша пураш логалын. А 2010 ийыште ужалыме аланыш, вараже рекламе пашаш куснен. Ынде лу ий ты аланыште тырша. Светланан ешыжын бизнесшат уло, автосервисым кучат. Тушто ӱдырамаш рекламылан вуйын шога.
Светлана пелашыж дене ныл икшывым ончен куштат. Эсогыл ик ияш изи уныкаштат уло. «Мый пелашемын ӱдыржым ончен-куштенам, сандене самырык кова улам»,- палдарыш Светлана.
Героиньына шуко шочшан ешыште кушын, шкеат ныл икшывым ончен-кушта, сандене йоча-влак деке тудо лишыл. Арам огыл поро кумылым ончыктышо «Поющая голубка» фондшат тӱҥ шотышто икшыве-влаклан полшымо дене кылдалтын.
– Ме тӱҥ шотышто икшыве-влак дене пашам ыштена, мутлан, опеке орган йочам еш гыч налын, но вес ешыш пуэн огыл. Тыгай ӱдыр-рвезе-шамычлан тӱрлӧ мастер-классым, пайремым эртарена. Йӧн лийме семын тӱрлӧ семын полшаш тыршена.
Фондлан кум ий, а йоча-влак дене пашам 2020 ий октябрь гыч тӱҥалынам. Тылеч посна ӱдырамаш-влак дене вашлиймаш-влакым эртарем. Тыште мыланем психолог улмем пеш полша. Шкешотан клубыштына тӱрлӧ пӱсӧ йодышым тарватена, чоным почын мутланена. Икманаш, калыклан полшаш, поро кумылым ончыкташ мыланем келша, — каласкала марий ӱдырамаш.
– Ты конкурсыш те кузе логалында? Мо таратен тушко ушнаш?
– Ондак «Мисс Удмуртия» этап лийын. Мый тушто «Йӱржӧ йӱреш» муро дене выступатленам. Тыгак йолташ ӱдырем да ӱдырем муреныт. «Мисс Благотворительность» номинацийыште мыйым палемденыт.
Москошто жюри ончыко лектын шогалмеке, мый тыге ойленам:
— Ты конкурсышто Одо мландын веле огыл, тыгак тукымем гыч чыла ӱдырамаш-влакын, марий-шамычын чапыштым аралем. Биоэнерготерапевт семын каласынем, сценыште мый шкет шогаш ом тӱҥал. Мый денем пырля тукым ковам-влак да тукымнан икымше ӱдырамашыжат лийыт. Нуным курым мучко темденыт, кыреныт, лапкаҥденыт. Поснак ӱдырамаш-влак шке мастарлыкыштым почын пуэн да шонен пыштыме корнышт семын такыртен кертын огытыл. Тидын нерген мыйын ӱмбалне улшо 300 ияш мониста ойла. Шучко сар да шужен илыме пагытыштат ты сӧрастарышым арален коденыт.
Шке жапыштыже «Российын Миссше» конкурсыш моткоч логалаш шоненам. Сценыште принцессе гай койын шогымем шуын. Родо-тукымем тыглай кресаньык лийыныт, нуно мланде пашам ыштеныт, нигӧ нигунам тыгай кӱкшытыш шуын огыл. Мый тидым ыштенам да нунылан пӧлекленам.
Светлана «Российын Миссше» конкурсышто «Достояние России. Гран-при» титулым сеҥен. Тудо «Топ 10″да «Российын 10 эн сай ӱдырамаш» радамыш логалын.
«Тиде конкурс деч вара чыла гаяк Тӱнямбалысе конкурсыш корно почылто. Мый Дубайым ойырен нальым. «Woman of Universe» («Женщина вселенной») и «Миссис Европа». Кокымшышкыжо ондакак логалнем ыле. Йошкар-Оласе ик тоштерыште калыкй вургемым йодынам. Тудым мый Дубайыште але Стамбулышто чияш шонем. Тидын дене мый ончыктынем: ме улына тиде Тӱняште.
Европын Миссше конкурсыш ушнымаш мыйым эше ик шонымаш деке лишкырак ышта: ача-ава деч поснак кодшо талантан йоча-влаклан рӱдерым почаш да нунылан у ешым муаш.
