Марий стикер-влак ешаралтыт
Интернетыште илыш «шолмо» нерген палыдыме еҥжат уке, очыни. Южгунам ты «юзо тӱняш» пуретат, ончен ӧрат, мо гына тушто ок ышталт, могай гына йӧн уке… Жапым эртараш я пайдале арверым ышташ – чылажымат кычал муаш лиеш. Мемнан тачысе геройнат ты «юзо тӱняште » шке тамгажым коден.
Шукерте огыл Оля Майкова (Мошкина) соцкыллан келшыше стикер-влакым ышташ тӱҥалын. Тиде пашам кузе вораҥдарымыже нерген палдарена.
– Стикер-влакым ямдылаш шонымаш кузе да кунам шочын?
– Ончыч тыгай стикер-влак дене мый пайдаланен омыл. Но Инстаграмыште стикер-влак дене сӧрастарыме фото-шамычым ужмеке, чӱчкыдын куанен онченам.
Тӱрлӧ блогер-влакын лаштыкыштым шергалам. Мутлан, шукерте огыл Йошкар-Ола гыч Онли Вегас семын шкенжым возышо ик визажист «сторисыштыже» стикер-влакым ямдылымыж нерген палдарен. Тудо программист огыл, мыйын гаяк тыглай айдеме. Тугеже тидым ышташ нелыжак огыл, манын шоналтенам, да интернетыште кузе ыштымым кычалынам. Тыге телеграммыште курсым верештынам, тунемаш тӱҥалынам.
Программе почеш тӱрлӧ приложенийым телефоныш ешаренам. Пашам ыштен ончымеке, ударакшым удалитленам, кӱлешаным коденам.Тыгак тиде темым келгынрак инстаграмыште шымленам. Стикер-влак дене пашам шуктышо-влакын лаштыкыштым онченам.
Стикер-влакым ятыр еҥ ышта, а молан марий стикерым ыштен ончаш огыл манын шоналтенам, да шонымашым илышыш пурташ тӱҥалынам. Тыге марий сынан сӱрет-влакым эркын ямдыленам, телеграм-каналышкем вераҥденам.
Телеграм-каналым изиш пойдарымеке, йолташ ӱдырем, Евгения Чемековалан ончыктенам, шонымашем дене палдаренам. Женя пашамым аклен, терген ончен, ой-каҥаш дене полшен.
– Шкешотан сӱрет манам гын, йоҥылыш ом лий, очыни. Нуным ышташ неле мо? Мыняр жап тидлан кая?
– Неле манын ом керт. Мылам тӱрлӧ редактор (приложений) дене пашам ышташ келша, садлан жап улмо годым ты сомылым шуктем. Ик коллекцийым ик касыште ышташ лиеш. Кунам гын кечыште ик сӱрет веле «шочеш». Тӱҥ шотышто ончылгоч иктаж пайремым ойырен налам да тиде кечылан иктаж индеш-лу стикерым шукташ тыршем.
– Могай площадкыште нуным кучылташ лиеш?
– Шонымем почеш Инстаграмлан келыштаренам, но йолташ-влак Ватсапыштат кучылтына манын возат. Стикер вет тиде тыгай тамга семын, тудын дене кеч могай сӱретым келыштараш лиеш.
– Мыняр стикер-влак кызытеш улыт?
–»Арнян кечыже-влак,» «Поро эр», «Паша але каныш кече», «Пытартыш йыҥгыр», «Кеҥеж» коллекций улыт.
–Тый кызыт изи ньогам ончен-куштет. А кунам творческий пашалан жапым муат?
– Самырык-влак смартфоным темдышташ жапым кеч-кунамат да кеч-куштат муыт, шонем. Южгунам ик кид дене коляскым шӱкем, весе дене телефоным «удырем». Но шукыж годым ӱдыремын малымыж годым шинчылтам.
– Стикер-влакым «калыкыш лукмеке» могай реакций лийын?
– Икмыняр коллекцийым ямдылымеке, Инстаграмыште тидын дене палдараш шонен пыштенам. Но тудым айда лийже тӱҥалме шуын огыл. Пашам кушшо тылзе гыч тӱҥалман, маныт калыкыште. Мый тиде шонымаш дене келшем, садлан келшыше кечым, адакшым шочмым, вученам.
Жап толын шумеке, арнялан ялыш акам деке каенам. Туштак луктынам да телефоным пӧртеш пыштен коден, пакчаш лектынам. Жап гыч телефонем ончальым, а тушто тынар шуко серыш. Теллеграм-каналышкат шагалын огыл ушненыт. Мый ӧрынам. Вет ты проект деч мый нимат вучен омыл, ыштенам да чыла. Ик-кок еҥ кучылтеш гын пеш сай лиеш, шоненам. Тыгай реакцийлан моткоч куаненам!
Йолташ ӱдырем, Женя, ВКонтакте сетьыште увертараш темлен. Тидын нерген шонен омыл ыле, но тушкат вераҥденам. Туштат икмыняр марий группо пост дене пайлалтын. Чылажат моткоч вучымыдын лийын. Паша лектышым аклымылан кажнылан моткоч кугу тау!
– Йоча-влаклан келшыше коллекцийым ышташ шонымаш уке?
– Шонымаш шуко! Кумыл да жап веле лийышт. Ончыч жап уло манын ойлышым, но тыштыже изиш шылтальым очыни. Марий тамга-влакымат кучылташ сай лиеш ыле. Ончыч кузе тидым илышыш шыҥдараш шоналташ, шымлаш, тунемаш кӱлеш.
Оля, тый моткоч кӱлешан, жаплан келшыше пашам шуктет! Умбакыжат пашат вораҥын шогыжо! У саскам умбакыжат вучена.
Тыгак палемден кодыман, «Унагудо» интернет-журналынат шке стикерже-влак улыт. Нуным «Унагудо» телеграм-каналыштына муын кертыда.
