Марий мыскарам вияҥда КВН!

18 ноябрьыште Йошкар-Олаште мыскарам йӧратыше-влак Марий КВН пайремыш погыненыт. «Тӱвыра поянлык – ӱвыра поянлык огыл» – тыге йоҥген черетан (9-ше) КВН-ын тӱҥ шонымашыже. Ты теме почеш пӱсӧ уш-акылым да мыскара шӱлышым республикысе куд эн чолга команде ончыктен. Команде-влак Волжск, Морко, Шернур районла да Йошкар-Ола гыч лийыныт.

Сеҥышыш Морко посёлкысо рӱдӧ тӱвыра полатын «РЦКД» командыже лектын. Кокымшо верым самырык-влакын «ВийАр» ушемыштын «Кечан кече» командыже сулен, а кумшо вер дене Шернур районысо «Нурвел» команде палемдалтын.
Тыгак поснак ойыртемалтше мыскараче-влакым тӱрлӧ номинацийыште палемдыме. «Эн ӱшанче капитан» лӱмым «Нурвел» команде гыч Дмитрий Веденькин налын. «Кечан кече» командын участникше Илья Воронин «Мыскараче пӧръеҥ» лӱмым сулен, «РЦКД» гыч Алевтина Ивановалан «Мыскараче ӱдырамаш» лӱмым пуымо. «Эн пӱсӧ мыскара» номинацийыште Волжский район Карай тӱвыра пӧртын «Шийгорно» командыже палемдалтын.

Марий КВН-ым Марий Эл Республикысе тӱвыра, печать да калык-влакын пашашт шотышто министерствын полшымыж дене Республикысе Марий тӱвыра рӱдер эртара.

Раисия Николаеван фотожо-влак.