Марий КВН пайрем

Автор — Алина Милютина

Тений Марий КВН 29 ноябрьыште Марий тӱвыра рӱдерын конференц-залыштыже эртен. Тудо 11-ше гана эртаралтын.

Историйым ончалаш гын, икымше гана тиде мыскара парем 2000 ийыште лийын. Республик кӱкшытыштӧ – 2003 ийыште. А 2023 ийыште икымше гана Марий Эл деч ӧрдыжыштӧ, Пошкырт кундемысе Мишкан селаште, эртаралтын.

Тений КВН-ыш ныл команде ушнен: Йошкар-Ола гыч «Кечан кече» (капитан — Валентина Семенова), «Манеш-манеш» студент тӱшка (капитан — Ирина Петрова), «10-КА» (капитан — Игорь Попов), Пошкырт кундемысе Мишкан села гыч «МММ» (капитан — Алексей Ибулаев). Вашлиймаш еш идалыклан пӧлеклалтын, темыже тыге йоҥген: «Муно чывым туныкта».

КВН программыште кум конкурс ыле: икымше – команде дене палымым ышташ.
Кокымшо конкурс – разминке, тушто кажне команде кок йодышым пуэн, а вес команде кумло секундышто тиде йодышлан эн оҥай вашмутым кычалын. Кумшо – мӧҥгысӧ паша.

Кум раундым иктешлен, жюри вер-влакым тыгерак шеледен: нылымше верым «Кечан кече» команде налын, кумшо верым – «Манеш-манеш», кокымшым – «МММ», а икымше верым – «10-Ка» команде сулен.

КВН гыч фото-влак:

Фото-влакым
Марий Тӱвыра рӱдерын
альбомжо гыч налме.