Марий комиксым илышыш шыҥдарат
Шарнем, изирак улмо годым шке ялысе книгагудыш миен, йоча журналым лаштыклаш йӧратем ыле. Комикс ужаш поснак келшен. Кугурак лиймеке, тыгайже шагал ужалтын. А теве Медведево посёлкысо Йоча творчество пӧртыштӧ изостудий занятийыш коштшо икшыве-влак комиксым шке сӱретлат да эше марий йылмыш кусарат! Тидлан нуным Лилия Вениаминовна Сазонова кумылаҥден шога.
– Тыште ынде кок ий пашам ыштем. Тылеч ончыч 32 ий Медведево гимназийыште туныктенам.
2017 ийыште Йошкар-Олашке финн сӱретче Санна Хукканен «Живой язык» проект дене толын ыле. Мыят тиде мастер-классыш ушненам. А вара 2-8 класслаште тунемше-влак дене комиксым сӱратленна, шкешотан таҥасымашым, выставкым эртаренна. Жап эртымеке, южо йочан комиксым сӱретлаш кумылжо утларак палдырнен. Умбакыже нунын дене ИЗО урокыштат, урок деч варасе занятийлаштат пырля пашам ыштенна. Тӱҥ шотышто марий легендым, преданийым да йомакым сӱретлена. Кызыт кок йылме дене тыгай пашам ямдылена гын, умбакыже кум йылме дене: марла, рушла да англичанла савыкташ шонымаш уло.
Йоча творчество пӧртысӧ изостудийыш 70 йоча коштеш. Нунын кокла гыч 15-20 еҥже историян сӱретым (комиксым) ышташ кумылан улыт.
Шуко пашанам «Ямде лий» ден «Звонок» газетлаште да «Кече» журналыште сывыктеныт.
Ик тунемшем нерген поснак каласен кодынем. «Политехник» Высший колледжын студенткыже Юлия Садкова тиде паша дене чот ылыжын, эсогыл пырля тунемшыж-влаклан шке мастер-классым эртара. Тудын пашаже-шамычым республик да регион кӱкшытысӧ конкурслаштат шуко гана сайлан шотленыт.
Мемнан ик кугу шонымашна уло: кок але кум йылме дене возымо комикс сборникым савыкташ. Иктаж грант конкурсышто сеҥена да шонымашна шукталтеш манын ӱшанена!
