Мӱкш илян кече дене!
Мӱкш илян мӱкш ешын мӱйым поген шуктымыжым ончыкта. Марий-влак мӱкш ончымым шнуй пашалан шотленыт. Ты пашам ару чонан, чатка еҥлан веле ӱшаненыт. Мӱй погымо жапыште, тудым кӱзымӧ годым юмылан кумалын, тудын деч перкем йодыныт.
Мӱкшлан кумалтышмут
Кугу перкеава, Мӱкш кугу юмо, Мер юмо дене ик ой-каҥашан лийын шогыза. Теле кечынат мӱкшетым поген шындаш пӱрен шогенат. Теле чатлама йӱштетымат ашнен лукташат пӱренат, серлагенат. А, теве шошо кечетат толын шуын. Ик омартажым, тӱжем омартажым лум йымач уралын луктын шогенат. А, луктын шоген, мотор кечыжымат пуэн шогенат, мӱкш-шамычат, модын лектын шогеныт, кап-кылыштым, лывыртен, омарташ пуреныт, шошым мотор кечет ӱмбал вынер лаштыкшымат кораҥденат, мӱкш омарта коргыжым эрыктен луктынат, мӱкш авалан туто вийжым пуэн шогенат. Ик караш лаке гыч вес караш лакышке иге муныжымат кушташ шогаш пӱрен, серлаген шогенат. Иге муныжым куштен, рӱжге омарташ лектын шогаш серлагенат. Мӱкш тӱшкаж дене погынен, игыжат шем пыл гай оварген лекташ пӱрен, серлаген шогенат, олма садыште, пакчаште лектын пӱтыралтын, поген налашат серлаген шогенат. Мӱкш тӱшкат дене мӱйым погаш каяшет йӧнештарен шогенат.
Ик саска пеледыш гыч вес саска пеледыш гыч, тӱжем саска пеледыш гыч поген конден, омарташке кондаш пӱрен шогенат. Памаш вӱд, куп вӱд, эҥер вӱд воктене рӱжге ызген, тӱшкан миен, мӱйлан йӧршӧ вӱдет дене конден шогенат. А, ик караш гыч вес караш гыч поген, ош ташма дене петырен, тичмашым ыштен шогенат. Тичмашетымат погымо дене марий калыкын кочшаш-йӱшаш мӱет дене йывыртыктен шогенат. Тале мӱй вӱдет дене ӱнарым пуэнат, осал чер дечат тырлыктаренат, саска сортатлан йӧршӧ шыштетымат конден шогенат. Мӱй карашетын ик карашыжым кинде сукыр гай шулык, тичмаш мӱй перкет дене илаш пӱрен шогенат.
Мӱй омарта кӧргыштыжӧ мӱкш деч утышо мӱӥжым тулен налын, мӱй клатышкет поген шынден, мӱй клат саска пушет дене илаш пӱрен шогенат ош марий калыкетлан, уло тӱня калыклан. Алал, йӧратен лийже, Мӱкш перке юмо, мӱкш отарет гыч мӱӥ погаш кайыме годымжат, озыркан мардеж деч, кӱдырчӧ. волгенче йымак логалме деч серлагышым, аралтышым йодын шогена. Изи капышт дене омарта гыч кузе лектын шогат, тугак тичмаш кап-кылет дене толын, тичмаш дене илаш пӱрен шогыза. Осал чер дечат, осал тул йып деч, осал кайык шинча деч, тӱрлӧ тӱсан кайык деч, писе шикш деч аралтышым ыштен шогыза. Мер кугу юмо, Мӱкш перке ава, тыйын мӱкш игет, тый дечет йодына тичмашым, аралтышым, серлагышым. Серлаген шого, Ош Тӱҥ кугу юмо дене пырля, Мер кугу юмо дене ик ой-каҥашым пидын, пелештен шогымына ашеш кайыже, шотеш кайыже, серлаген шого. Мӱкш перке аваже, мӱкш перкем пуыметлан мӱкш илянже мӱй саскам пуыметлан клат кӧргӧ мӱй печкет ден мӱй шорват дене саска сорталык шыштетлан. Алал лийже.
А.Таныгинын «Ош сандалык ончылно» книгаж гыч налме.
