«Курмызак олыклан» – 30 ий!
11 июньышто Татарстан кундем Агрыз районысо Кӧлегеш ялыште «Курмызак олык» ансамбльын 30 ияш лӱмгечыжым пайремленыт.
Ты ансамбльым 30 ий ончыч Вячеслав Михайлович Михайлов ден Олег Александрович Третьяков чумыреныт. 1996 ийыште тӱвыра пӧртым Валерий Искатович Исаков вуйлаташ туналын. Художественный вуйлатышылан Владимир Ефимович Сарманаев тыршен. Турло жапыште клуб директорлан Станислав Владимирович Петров, Раиса Ульяновна Михайлова, Елена Михайловна Внебрачных пашам ыштеныт. Кызыт чапле, у тӱвыра пӧртым Ангелина Леонидовна Никитина вуйлата. Художественный вуйлатышылан Оксана Кондратьевна Петрова тырша.
Пайрем программым Василий Семёнович ден Оксана Кондратьевна Петровмыт ямдыленыт, нунак вӱденыт.
– Ансамбльыш тӱрлӧ ийготан еҥ-влак коштыт. Нуно чыланат мурат, куштат, кружоклаш коштыт. Пайремыште изижге-кугужге участвоватленыт. Ансамбльын икымше составшымат погенна. Чылан выступатленыт, шке мастарлыкыштым ончыктеныт.
Тау, организатор-шамычлан, школышто тыршыше-влаклан, клуб вулатышылан. Чылан пырля погынен, пайремым веселан эртарен колтышна, – каласыш Кӧлегеш тӱвыра пӧртын художественный вуйлатышыже Оксана Петрова.
