Кугешнаш тарата «Кушна мланде»
Морко район Изи Кушна тӱвыра пӧрт пеленысе «Кушна мланде» ансамбль 1988 ийыште чумыралтын. Эн ончыч тушко кугурак класслаште тунемше ӱдыр-рвезе-влак коштыныт. Но вашке рвезе-влакым армийыш наҥгаеныт. 1990 ийыште кугурак-влакат кошташ тӱҥалыныт. Эн ондак репертуарышкына «Семык пайрем» йӱлам пуртышна. Эрвел марий, тошто марий да Морко сӱан куштымаш-влакым ямдыленна, марий калык муро-влакым муренна. Тиде ийынак калык фольклор ансамбль лӱмым сулен налынна.
34 ий жапыште сценыште тӱрлӧ марий пайрем йӱлам ончыктенна, «Шорыкйол кас», «Мужедме кас», «Ӱярня», «Армийыш ужатымаш» «Семык», «Морко сӱан» лӱман программына уло. Тыгак фольклор дене кылдалтше ятыр композицийым ямдыленна («Ял воктене», «Садеран-ломберан Кушна кундем», «Кастен уремыште»).
Репертуарышкына шукыж годым шкенан кундемысе калык мурым, такмак-влакым, семым да йӱлам пуртена. Ондакысе солистна Лидия Тимофеевна Иванован возымо такмакше-влакым кызытат мурена. 3-шо апрельыште тудлан 86 ий темын.
Ансамбль кызытат Изи Кушна клуб пелен чумырга. Йочаге 21 еҥ улына. Шордур да Изи Кушна клуб пашаеҥ-влак ушненыт. Клубна тошто гынат, калык тушко куанен толеш. Тений ялысе клуб коклаште «Эн сай клуб» лӱмым нална да лауреат лийна, окса пӧлекым пуышт. Паша лектышнам ужын, гармоньым да ноутбукым пӧлеклышт.
Ме тӱрлӧ вере лийынна: Чуваш республикыште «Родники России» фестивальыште, Башкортостан кундем Мишкан районышто «Сабантуй» пайремыште, Ульяновск олаште эртаралтше «Свадьба в Обломовке» фествальыште. Санкт Петербургыштат «Сӱан йӱла» композиций дене калыкым куандаренна. Тылеч посна республикысе конкурс ден фестивальлаш кертмына семын коштына. «Шӱкшак сӱан» да «Имне пукшымаште» фольклор композицийла дене республикысе конкурслаште да семинарлаште мастарлыкнам ончыктенна.
Тыгак ансамбль пелен «Эр ӱжара» йоча фольклор коллектив пашам ышта. Калык лӱмым нумалше «Кушна мланде» фольклор ансамбльым Марий Эл тӱвыран сулло пашаеҥже, «Калыкын чонжо» премийын лауреатше Владимир Васильевич Кудряшов чумырен да кызытат вуйлатен шога. Ялыште калыкна шагалемын, шукыжо ӧрдыж кундемыш коштыт, садлан еҥ-влакым погаш нелырак. Йӧра, эше школ ден йоча сад улыт. Ме ваш келшен, умылен пашам ыштена.
Изи Кушна Тӱвыра пӧртын
художественный вуйлатышыже
Н.Л. Кудряшова.
