Корно…

Автор – Виктория Матвеева.

Самырык пагытын сӧралже – ончылно улшо кугу тӱня, кумда корно. Ача-ава суртым коден, ме олалашке тӱрлӧ амал дене вашкена: тунемаш ма, паша лекме дене да тулеч моло. Тыгодым икте шочмо ялышкыже пӧртылеш, весе тора кундем дене илышыжым кылда, кумшо олаштак кодеш. Но ала-молан гын ӱшаныме шуэш, кеч могай жапыштат кажнылан мӧҥгӧ пӧртылмӧ корно эн лишыл, шергакан, кокланже кумылым тодылшо.

Мыйынат йӧратыме шочмо Кӱчыкэҥер ялем Морко кундемыште верланен. Ялын кок могырыштыжат пасу шарлен возын, воктенак корем-влак, олык, изирак чодыра ото-шамыч дене пойдара. А мо мыланем утыр келша-кок ял мучаш гычат вес ялыш тыглай корно шуйна.

Корно… илыше, курым дене тошкалтше, калыкым ушышо. Лектат я эрдене, я кастене ял мучашыш, а тушто торашке шуйнышо корно тыйым ончыко ӱжеш але ялышкет куанен пурта.

Ушышко ондаксе ик фотосӱрет пура: Кӱчыкэҥер ял калык да пошкудо Элесола калык шудым солен толмышт годым тиде корнеш каналташ шогалын, фотосӱретым ыштеныт. Тунам эше колхоз олыкым сола дене ял калык солаш коштын. А мыняре имне орва эртен тиде корно дене?.. Да тиде дене веле мо? Пошкудо Шеҥыштӱр ялыште ондак имне вӱта верланен, ял гычын ялыш корно эре лийын. Да лийже! Кузе вӱд йогын-влак икте-весыштым ушат, тыгак калыкыште лийже пеҥгыде кыл, вашумылымаш, вашполшымаш. Лийже корно Моркышто, Шернурышто, пошкудо кундемыште!

Могай ласка кеҥежым, велосипедыш шинчын, тыглай корно дене кудалаш. Ял гычын ялыш, сурт гычын суртыш, шӱм гычын шӱмыш…