«Кок тӱрлӧ тӱня»вашлийын: оҥай шонкалымаш
Ме «Москва-сити» офис ваштареш кафеште шинчена.Ӱстембалне ала-могай графикан монитор шоген. Йоҥылыш ом лий гын ИИ (искусственный интеллект) технологий дене кылдалтше. Тыгак пытартыш экспедиций гыч кондымо урмӧрым (морошка) чайникыш ямдылен шындыме.
Южо еҥын погыжо индеш ноль дене пытыше акан. Лач тыгай айдемылан шукертак йодышым пуаш шоненам ыле.
Кызытсе илышыште ИИ манмет кодым воза, а корпораций-влак виртуальный тӱням колонизироватлат. Молан ты саманыште мыланна ожнысо муро, пӱчӧ ден издер, диалект-влак кӱлыт?..
Ты гана шонымашем шукталте, йодышем каласышым:
– Тый инвестицийым ончыкылык илышлан ыштет, а мый этноблогер улам, ожнысым арален кодаш тыршем. Мыйын сомылем кӱлдымыла ок чуч? Чыла тиде 2026 ийыште кӱлеш мо?
– Йырваш ончал, ме чылан икгай лийын пытенна: икгай кофем йӱына, икгай брендын вургемым чиена, сериалым ончена. Бизнесыште тиде «йошкар океан» маналтеш – вашла ончен ыштыме пазар.
Изи чотан калыкын тӱвыраже — посна ойыртемалтше код. Тыгайым лабораторийыште ончен-кушташ огеш лий. Кызытсе жапыште чылажымат копироватлен ышташ лиеш, лач ойыртем гына шергын аклалтеш. Тыйын коми-ижемец калыкет эртыше курым огыл, тиде –«эксклюзив». А эксклюзив эре кугу акан.
Палет молан кугу системе-шамыч шаланат? Нуно икгай улыт. Тӱнямбалне иктаж туткар лиеш гын, оласе еҥлан илен лекташ неле лиеш.
Изи чотан калык курымла дене илен лекташ йӧным кычалын да чыла тӱрлӧ ситуацийлан ямде. Нуно пӱртӱс тӱня, калыкын психологийже, кӧргӧ вий нерген шагал огыл палат. А олалаште илыше-шамыч ты поянлыкым йомдареныт. Тиде тендан, изи чотан калыкын, шкешотан «страховой полисше».
Тошто йӱла дене илем манын ит шоно, тый «Юзо» шӱлышым аралыше еҥ улат. Калыкын шке йылмыже, йӱлаже уло гын, тугеже суверенитет манмет йомын огыл. Тидыже швейцарийысе банкысе счёт деч шергынрак аклалтеш, – чайым подылшыла каласкалыш тачысе йолташем.
Ты вашлиймаш деч вара мый шулдыраҥше лектынам. Шуктымо пашам арам огыл. Ме йӱдвел калыкын тӱвыражым аклен, шотлен илен, шкешотан миссийым шуктена.
Коми этноблогер Генрих НЕМЧИНОВ .
