Коҥганур школыш мийымеке…
Кодшо тылзын «Ончыко» журналын пашаеҥже-влак дене пырля Кужеҥер район Коҥганур школышто уна лийна, туныктышо да йоча-влак дене вашлийна, тӱрлӧ нерген мутланышна. Тыгай сынан вашлиймашлаште такше ончычат ятыр лиялтын, но марла умылышо да ойлышо, марий мурым да сылнымутым йӧратыше йоча-влак дене палыме лиймеке, чонеш поснак волгыдо шарнымаш кодеш. Ты шарнымаш варажым ятыр жап кумылым нӧлта, марий йылмын ончыкылыкшо шотышто ӱшан тул семын чоным ырыкта.
Коҥганур школышто кызыт 80 йоча тунемеш. Тышке Коҥганур, Тумньымучаш, Пекейсола, Одобеляк, Нурсола, Старсела, Лопсола гыч тунемше-влак коштыт. Школ пелен йочасад пашам ышта, тоштер уло. Шошо вӱдшор пагытыште школ тувраш «лушкыдырак» улмыжым палдара гынат (мемнан мийыме годым коридорышто верын-верын чыпчыше вӱдым погаш ате-влак шогат ыле), тысе пашаеҥ-влакын кумылышт ок воло, нуно сай ончыкылыклан ӱшанен илат, шке пашаштым йӧратен ыштат.Тӱҥ шотышто ты тунемме вер республикысе моло школ деч утыжым ок ойыртемалт. Икте шотышто кугешнен каласыме шуэш: тыште марий йылмым йоча-влаклан шочмо йылме семынак туныктат. Тыгак марий литератур дисциплине уло. Ынде тыгай уверым ме теве тыге куанен ойлена! Вет районласе ятыр школлаште кызыт ача-ава-влак шочмо йылме семын руш йылмым тунемме шотышто йодмашым возыштыт. Тыге марий йылме кугыжаныш йылме семын веле туныкталтеш. Сандене школышто шочмо калыкнан йылмыжым кугезе йылме семынак пагален, жаплен, келгын тунемме нерген возыде чытет мо?
Марий йылмым аралыме да вияҥдыме нерген ме Коҥганур школын директоржо Марина Ильинична Иванова дене мутланышна.
– Ме ача-ава-влак дене пашам ыштена, мутланена, собранийлаште шочмо йылмынам тунемаш кӱлеш манын умылтарена. Чыланат чыла умылат, йодмашым шочмо йылме семынак тунемшаш нерген возат, иктат тореш лийын огыл. Тылеч посна школысо мероприятий-влакым марла эртарена. Туныктышо-шамычат, йоча-влакат ты шотышто моткоч тыршат. Марий йылме ден литературым туныктышына Галина Степановна Тойбекова йоча-влакым кумылаҥдаш манын, тӱрлӧ йӧным кычалеш, мутлан, «ватсапыште» шинчымашым пойдарыме серышым, фотом колтылеш. Кызытсе программе неле маныт. Но туныктышо шке семынже савыралын моштышаш, йӧным мушаш, – умылтарыш Марина Ильинична.
Фотошто Коҥганур школ пеленысе тоштерым ончалаш лиеш. Тыште школын историйжым, тиде школышто тунемше чапланыше еҥ-влак нерген материалым, тошто арвер-влакым погымо.
