Келшымаш полатын шочмо кечыже
2023 ий 17 май Марий Эл Республикын да тыште илыше калык-влакын историешышт возалт кодеш. Ты кечын Йошкар-Олаште Келшымаш пӧрт почылтын.
Келшымаш пӧртым 2021 ийыште чоҥаш тӱҥалыныт, ты пашалан 390 млн теҥге ойыралтын. Тылеч посна 300 млн теҥге тӱрлö оборудованийлан каен. Кызыт ты полатыште офис пöлем-шамыч, тӱрлö вашлиймашлан, ончерлан келыштарыме вер-влак, концерт ден репетиций-влакым эртараш йöнештарыме икмыняр зал, тыгак калык-влакын сийышт дене палдарыше кафе улыт.
Марий Эл Республикым вуйлатыше Юрий Зайцев:
– Мемнан республикыштына 50 утла тӱрлö калык ила, 30 утла калыкле-тӱвыра мер ушем-влак пашам ыштат. Сандене таче Келшымаш пöртым почмына – республикысе да уло элысе калык-влакын пырляшке ушнымыштым ончыктышо символ. Тиде чапле вер мемнан кундемыштына илыше-влакым веле огыл, тыгак уло элысе калык-влакым ушышаш. Молан манаш гын лачак келшымаште, пырля улмаште – кугу Элнан куатле вийже. Тек калык-влак кокласе келшымаш вияҥеш да элнам ончыко вӱда.
Фото: Келшымаш пöртысö икымше ончер – «Большая Волга». Тыште Юл кундемысе мастар-влакын сӱретыштым, тӱрлö скульптурым да кидпашам ужаш лиеш. Ты ончер август мучаш марте пашам ышта.
Фото-влакым Интернет гыч налме.
