Калык вургем пайрем

Башкортостан Республикыште ий еда апрельыште да сентябрьыште Национальный вургем кечым пайремлат. Тений ты пайрем 15 апрельыште палемдалтын, Пошкырт кундемыште илыше-влак 14-16 апрельыште шке калык вургемымыштым чапландарыше тӱрлӧ сынан мероприятийым эртареныт, вургем ойыртемым ончыктымо флешмобыш ушненыт.
— Пайрем кечын Ӱпӧ оласе «Арт-Квадрат» рӱдерыште кугу мероприятий эртаралте. Тушто меат калык ончерым чумыренна, марий калык вургем дене палдарыше-шамычлан посна палатке ойыралтын. Ятыр мастер класс, усталык сынан вашлиймаш лийын. «МуроЭм» ансамбль дене пырля меат ончаш толшо-влакын кумылыштым нӧлтышна, марий калыкнан тӱвыраже да вургемже дене палдарышна.
Башкортостаныште шуко калык ила. Кажне калыкын йылмыжым, тӱвыражым, йӱлажым аралаш кӱлеш. Национальный вургем пайрем лач ты шонымаш денак эртаралтеш, – каласкалыш Мишкан селасе Марий историй да тӱвыра рӱдерын тӱҥ специалистше Алексей Ибулаев.