Юзо отросо илыш
Медведево посёлкысо «Чудо-остров» зоопарк олмышто ончыч ир лудо-влакын купан илемышт лийын. 1945 ийыште посёлкышто илыше-влак тышан пожарный котлованым кӱнченыт. Тыге ер шочын. Тысе райисполкомым вуйлатыше Г.И.Шошинын паша надыржым шотыш налын, ерым Шошин ер манын лӱмденыт.
Ер воктене посёлкысо калыклан сылне каныме вер лийын. Еҥ-влак йӱштылыныт, колым кученыт, телым курыкан серыште мунчалтеныт, эсогыл физкультур урок-влакат тыште эртаралтыныт.
Но жап эртыме семын ерыште да воктеныжат тӱрлӧ шӱк погынен, ер кошкаш тӱҥалын. 1999 ийыште ерым эрыктеныт. А 2000 ийыште Марий Элын калык артистше, цирк пашаеҥ, акробат, дрессировщик Габдулхак Габдуллович Гибадуллинын темлымыж почеш ты верыште зоопаркым почыныт.
«Юзо отро» зоопаркын кумдыкшо – 400 квадрат метр. Тыште тӱрлӧ кайыквусо, ир янлык-влак улыт, вольыкымат ужаш лиеш. Зоопаркыш йоча-влак веле огыл, кугыеҥ-шамычат уло кумылын коштыт. Нуно пеленышт отрошто илыше тӱрлӧ чонан-влаклан кочкышымат кондат. Такшым тыште нуным пукшышо, илемыштым эрыктыше пашаеҥ-влак улыт, сандене шке семын сийлен коштмо сайжак огыл. Чылажымат верысе пашаеҥ-шамыч дене каҥашыман. А лучо намийыме кочкышым пуэн кодаш.
Зоопаркыш толшо-влак деч «Йӧратыме янлыкда але кайыкда уло?» манын йодмылан шукынжо Дуся лӱман маска нерген ойлат. Тыгак Вовчик пирым чыланат ончаш йӧратат. Мийымына годым тудо чарныде урмыжеш ыле. Тидыже ончаш толшо-влаклан поснак оҥайын чучын. Ӧрат веле: зоопаркыш янлык-влакым чодыра гыч огыт кондо, нуным лӱмын ончен-куштат гынат, пӱртӱсын вийже деч нигуш от шыл. Пире пирак кодеш, «инстинкт» манмет ок йом, сандене тудын четлыкшат икмыняр лончан. «Тыште пирылан шыгыр» манше еҥ-влакат улыт ыле. Ты ойым колмеке, зоопаркын пашаеҥже увертарыш: вашке Вовчик у да кугурак илемыш кусна. Тушто тарванылашыже кумдык шукырак лийшаш.
