Йӧратыме пашам кеч-куштат ышташ йӧн лектеш

Творческий пашам тӱнян кеч-могай ужашыж гыч ышташ лиеш. Теве, мутлан, самырык дизайнер Алина Хорошавина шукерте огыл илыме вержым вашталтен. Мо дене тиде кылдалтын?

-Ончыч Йошкар-Олаште пачерым айлен иленам. Вара тудым ужалаш луктыныт да мыланем вес илыме верым кычалаш кӱлын. Тунам мыланем моткоч оҥай шонымаш ушыш толын пернен: садак вес пачерым кычалман да тушко кусныман гын, лучо теҥыз воктеке илаш каем. Тыге шукертак шонен коштмем илышыш шыҥдаренам. Арня жапыште вургем ора деч утленам: палымем-влаклан пуэденам, икмыняржым ялыш наҥгаенам, да ик чемодан вургемым пырля кондаш погенам. Оксам шукыжак лийын огыл, самолет дене чоҥешташ билетлан да арня илашлан лач ситен. Кум кечылан хостелым айленам, тушко миен пуренам. Ӧрын, но руш манмыла мечтам шукташ каенам. Вигак пашам кычалаш тӱҥалынам, мебельныйыште эпоксид киш дене художникын сомылжым шуктенам. Тушто ныл тылзе пашам ыштенам. Хостелыште ик ӱдыр дене палыме лийына. Тудын дене пырля пачерым ик тылзе айлен иленна. Вара илышем куштылемын: вургемым ургаш йодмаш-шамыч уэш пураш тӱҥалыныт. Тыге мебельный организаций гыч кораҥынам. Кызыт шканем шке вуйлатыше улам, шонымем семын пашам шуктем, жап шотышто нимогай чарак уке.

– Тый тыгак мультфильмысе герой сынан тӱрлӧ костюм-влакым ургет манын шекланенам.

– Тыге. Сочи олаште ик сайт гоч мастар ӱдырамаш дене палыме лийынам. Тудо аниматор-влаклан костюмым урга. Йодын толшо ятыр, а шкет шуктен огыл. Тыге мый тудынтуныктымыж почеш костюм-влакым ургаш тунемынам. Ты паша мылам моткоч келша. Сомыл куштылго огыл гынат, шкешотан, шуко вийым да жапым «пöлеклаш» йодеш.

– Йоҥылыш ом лий гын, тыйын ямдылыме свитшот (кофто) манметым ВДНХ-ште эртаралтше «Россия» выставкыште Марий Элым ончыктышо-шамыч чият. Шке темленат але тыйым верысе организатор-влак муыныт?

–Тимофей Евсеев лӱмеш тоштерын пашаеҥже Ирина Якаева выставке ямдылалтме нерген возен, тушко кызытсе жаплан келшыше да ик сынан вургем кӱлын, сандене мый икмянр тӱрлö дизайным темленам. Тӱвыра, печать да калык-влакын пашашт шотышто министерствыште онченыт, ойыреныт. Тунам мыйын заказат шуко лийын, а жап шагал. Но мый йӱдым мален омыл, нине свитшот-влакым ургенам. А вара кокымшо гана заказым ыштымышт годым уже ательеш ургызо- шамычлан заказым пуэнам. Нуно ургаш полшеныт.

– Марий Эл гыч кайыметлан от öкынö?

– Уке, нимынярат. Тыште моткоч мотор пӱртӱс, сай климат. А мöҥгö кеч-могай жапыште миен-толын кертам.