Интернет гочат шинча возеш мо?
Иктаж-кӧ мыланем тыгай йодышым пуа гын, «уке» манын вашештем ыле докан. Но шкеак тидым шижмеке, тыге вашешташ ом тошт.
Шукерте огыл ВКонтакте соцкылыште вияш эфирым эртарышна. Шуко мо, шагал, чыла тиде пел шагат утларак шуйныш. Мемнам тунам 5000 еҥ ончен (таче марте 10000). Калык возен, йодыштын, тиде мемнам чот кумылаҥден. Эфир деч варат ме «шулдыраҥше» коштынна. А йӱдым малымем годым иктаж 3 гана чытырналтын помыжалтым, кӧргыштӧ лӱдмо кумыл озаланен. Мутлан, трукышто лакыш камвозам але мый денем ала-мо уда лиеш…
Тугеже шинча возын?
Тиде шижмаш мылам палыме. Изи годсек чӱчкыдын шинча возеш.
А кузе шинчавочмо деч аралалташ?
1. Булавкым пижыктен коштман. Йымал вургемышкат лиеш.
2. Южо еҥ кидешыже йошкар шӱртым кылда.
3. Калык тӱшкан погынымо вер гыч пӧртылмеке, Юмынвӱд дене мушкылтса. Ӱмбал вургемдам алмаштен чийыза.
4. Эше изи улмына годым ковам тыге ышта ыле. Коҥгаш олтымыж годым таганым (подкова) коҥгаш пышта ыле. Коҥгам петырымеке, таганым вӱдыш пышта. А мемнам омса лондемыш шогалтен, тиде вӱдым мемнан ӱмбак тӱргыкта ыле.
5. Изи йоча-влаклан саҥгашкышт шӱчым йыгат.
6. «Осал шинчан» еҥ деч аралалташ манын, иктаж мотор шӱшерым, алгам, кидшолым пижыктыза. Тек нуно осал еҥын ончалтышыштым шкешт дек савырат.
Шинча вочмо деч кузе аралалташ кӱлмӧ нерген
Интернетысе йолташна-влак каласкалат
Татьяна Яковлева:
— Эргым азаж годым шинча вочмо дене чот орлана ыле. Саҥгашке шӱчым йыгыме нерген паленам, еҥыным ужынам. Авам деч тыге ышташ лиеш мо манын йодым, но тудо ок йӧрӧ мане. Тудо чевер шӱртӧ гыч тӱрлӧ настам пидеш ыле. Тыгайым азалан я шӱэшыже, я оҥешыже булавке дене сакенна.
«Сонарзе»:
— Кум шырпым налат, иканаште удыралат, кружка гыч вӱдым подылын, йоча ӱмбаке тул вошт пӱргалат. Тыге кум ганан ыштыман. Тиде икшывым шинча вочмо деч арала.
Татьяна Ибатиева:
— Шинча возын кертмылан ӱшанем. Мыланем изиэм годым кидешем йошкар кандырам кылдат ыле. Кызытат браслетым нумалам. Тыгак вӱд полшымо дене аралалташ лиеш. Юмынвӱд дене веле огыл, тыглай вӱд денат шӱргым чывылташ лиеш. Шуко еҥ коклаште лийме деч вара, моҥгӧ толмеке, мушкылтман. Тыге уда энергетикым мушкын колтыман.
