Эн вучымо уна — кеҥеж!
Нина Щербакова
***
Эр ӱжара ден тыйым саламлем,
Ужат, чеверын койын воштылеш.
Тошкемыш лектын, чон дене канем,
Яндар лупсеш эр кайык йӱштылеш.
Шогал ик татлан, юж аҥыртарен,
Йырваш йомак тӱня гай олыкем.
А кечыйол йолгорным ырыктен
Куржеш, поктен ок шу – мый йывыртем.
Кидем шаралын, шокшыжым налам,
Капем ден шижын, шӱмышкем пуртем.
Пӱртӱс куатым шып йывылтылам,
Оҥем гыч луктын, мурым муралтем.
Пеледыш помыжалтын почылтеш,
Лыжга мардеж ден модын тарванал.
Аралтыш пӱрыш ден илаш ыле уэш,
Пырля тошкалын шыргыж савырнал.
Виктория Матвеева.
Канде кумыл
Мом каласет мылам тый таче,
Пелед шогалше олыкем?
Каналтынем, ом лий шояче,
Вӱчкалте нойышо кумылем.
Мый муралтем гын, лий шиялтыш,
Шинчавӱд дене колыштнем.
Йӱкша мутем гын, лий аралтыш,
Лай порсын возын вачышкем.
А кандывуйым, кандым-кандым,
Тыглай сӧралым йӧратем.
Поген кидеш, кондем ӧндалын.
Тый кучо канде кумылем!
Ольга Эльтемерова
Кеҥеж
Адакат кеҥеж толеш,
Кече шокшырак лиеш.
Снеге пуш йырваш шарла,
Кайык куанен мура.
Кеҥеж, кеҥеж,
Чевер кеҥеж —
Эн вучымо уна.
Кеҥеж, кеҥеж,
Чевер кеҥеж —
Йоча еш куана.
Йыр пеледыш пеледеш,
Лыве ден мардеж модеш.
Корем вӱдшӧ йывырта,
Йоча-влакым йӱштылта.
Галина Сайтаева
***
Кавам тачат йӱр пыл леведын,
Сар кече йомыныс тушак.
Мландем тыгат волгалт пеледын,
Шарлен шудан ужар тӧшак.
Велалтын кумылышко шӱлык,
Куан толеш мо кече ден?
Ончем тораш, а чон гын тулык
Шкет кодмо жапым шарныктен.
Пиал гын, мурышо чылт кайык,
Кучен от шукто – чоҥешта,
Кидет лушка – чымалте, кайыш,
Ала-куш адакат вашка.
Тек йӱр йога, чот мушкын шудым,
Кеҥежым волгыдым сӧрен.
Мый йӧратем эрелан тудым,
Оем нигӧ ок керт шӧрен.
Анна Алкече
Вучымо кеҥеж
Толын вучымо кеҥеж.
Йӱштым петырен леҥеж.
Йӱштӧ шыле чоҥештен,
Кече лекте пелештен:
«Саламлем у кеҥеж ден,
Тольым тамле емыж ден».
Поро лие лай мардеж.
«Ӧндалам шыман, – манеш. –
Леве йӱрым конденам,
Теҥыз тӱр гыч поктенам».
Тек чыла йырваш кушкеш,
Мландым ямле йӱр мушкеш –
Кажне кушкылжо йӱэш.
Тамле вӱд моткоч кӱлеш.
Мланде угыч илана!
Куанен ме илена!
Телылан ямдылена,
Шыжым ямде лийына.
Светлана Алексеева
Ӱжам
Ӱжам пырля каяш кеҥежыш:
Лупсан тошкемыш
тамлаш «эҥежым»,
Погаш висвисым, торгавуйым.
Пуртем памашыш,
ноет гын, луйык.
Ужат: модеш йорга мардежше
Ужар лышташ ден.
Шем пыл, шыдештше,
Шӱтла печкалтын. Йӱржӧ дечын
Шылаш ит тырше
ты шокшо кечын.
Тӧр олыкым посто леведын:
Торашке снеге
коеш чеверын.
Лӱжга рушӱп йолважым шийын.
Ала толметым
ондакак шижын?
Изи мӱкшлан мурен мӱйшудо,
А пушыжо-о: шӱм-чон мо рушто?
Ший полдыш гае ер воктечын
Нигӧ ок эрте
пурен лекде гыч.
Чевер кеҥежын йӱдшӧ кӱчык,
Омсамым тушко
ом шынде тӱчын.
Ю кумыл оҥ пеленже ишыш:
Миет кеҥежыш,
улатыс лишыл.
