Ӱдыр модмаш йӱлам шуктена
Автор — Катерина Камалиева
Ӱдыр модмаш – тиде марлан кайышаш ӱдырын шке таҥаш йолташыже-влак дене чеверласымаш. Эрвелмарий-влакын ӱдыр модмашышт кас велеш тӱҥалын. Тиде жапыште качын суртыштыжо сӱанлан ямдылалтмаш эртен. Кутырен келшыме верыш оръеҥ ден йолташ ӱдыржӧ-влак да вуйым пӱтырымо ава толыныт. Йӱла почеш ожно ӱдыр модмашым але самырык-влакын вес пайремыштым айлен налме пӧртыштӧ эртареныт. Тыгодым сурт озалан окса олмеш вес ӱдыр модмашым туштак эртараш сӧрымашым пуэныт.
Совет жапыште тиде йӱлам клубышто але уремыште эртареныт.
Ӱдыр модмашын ик эн тӱҥ ойыртемже: оръеҥ да тудын лишыл йолташ ӱдыржӧ-влак пайремыште гармонь сем почеш куштен-мурен огытыл. Тидлан вес ӱдыр-рвезе-влакым тарленыт.
Оръеҥ куштышо ӱдыр-влаклан шовычым пӧлеклен, гармонист ден куштышо рвезе-влаклан – солыкым. Ава ший окса дене тауштен, но тудо стакан пундашыште киен. Тудым налаш манын, стаканыш темыме пурам але аракам йуын колтыман улмаш. Жап эртыме семын мурымаш-куштымашке ялысе калык ушнен, нуныланат мелна ден пурам темленыт.
Ӱдыр модмаш годым оръеҥын марлан кайымыж деч ончыч тудын иктаҥаш йолташ ӱдыржо-влак пытартыш пайремым пырля эртарат.
Оръеҥ огеш кушто, огеш коч, пайремыште шып шинча. Тыге тудо шке таҥаш ӱдыр-рвезе-влак деч ойырлымыжым ончыкта. Оръеҥ пуйто ӱдыр годсо илышыштыже кола да вате лийын уэш шочеш.
Эрвелмарий ӱдырын тиде койышыжо руш да мордва ӱдыр-влакын сӱан деч ончыч шортмыжштым ушештара.
Тиде жапыштак вуйым пӱтырышӧ ача-аван суртыштышт каче ден йолташыже-влак пайремым эртарат. Вуй пӱтырымӧ ава клубыш оръеҥ деке кая да качын толмыж нерген да шовырым почкалташ кӱлмӧ нерген шижтара.
Оръеҥ йолташ ӱдыржӧ дене уремыш лектын, кече лекме велыш савырнен, шовыржым кудашын да почкалтен. Вара тудым уэш чиен да верышкыже миен шинчын. Уремыш лекме, вургемым почкалтен чийыме оръеҥын вес ешыш пураш ямдылалтмыжым ончыкта.
Авторын фотожо.
Марлаш Надежда Моисеева кусарен.
