Буймышто — Ломберский лудмаш
16 февральыште Татарстан кундем Агрыз район Буймо школышто марий писатель, туныктышо, мер пашаеҥ Илья Михайлович Ломберский (Токмурзин) лӱмеш II-шо лудмаш эртаралтын. Ты пайрем писательын усталык пашажын тӱҥалтышлан 100 ий теммылан, Шочмо йылмын тӱнямбалсе кечыжлан, Педагог да наставник идалык мучашлалтмылан да Российыште Еш идалык тӱҥалмылан пӧлеклатын.
Ломберский лудмаш икмыняр номинаций дене эртен. Йоча-влак Татарстан кундем Агрыз, Менделеевский, Арский, Мамадышск, Мензелинск, Балтач районла гыч, Марий Эл да Удмуртий республикла гыч лийыныт. Нуно сылнымут мастарлыкыштым ончыктеныт, еш темылан пӧлеклалтше усталык конкурсышто, И.Ломберскийын произведенийлаже негызеш сӱрет номинацийыште, юнкор, шымлымаш да методический проект пашам виктарыше семын таҥасеныт. Организатор-влакын палемдымышт почеш, чылаже конкурсыш 142 йодмаш пурен.
Эмма Николаевна Ильина, Буймо школышто марий йылмым да литературым туныктышо:
– Ломберский лудмашым икымше гана 2000-ше ийлаштак эртаренна. Тунам пошкудо Кӧлегеш да шкенан школысо мастарын лудшо да шке возышо йоча-влакым чумыренна ыле. Илья Ломберскийже одо кундем Ныргында ял гыч вет, мемнан ял гыч огыл, сандене молан ыштат манше-влакат лийыныт ыле. Вара ме шкенан Буймо школышто тунемше Валентин Исенеков лудмашым эртараш тӱҥална. Кызыт тудым кок ийлан ик гана эртарена, кодшо ийын кумшо гана эртарен колтышна. А тений мыланна РОНО гыч уэш йодмаш тольо – регион-влак кокласе мероприятийым эртараш. Тений Еш идалык палемдалтеш, тудын денат кыл лекте. Илья Ломберский мемнан школышто пашам ыштен, туныктен, еш ансамбльжым чумырен.
Жап чӱдӧ ыле гынат, пашам пижынак ыштышна. Положенийы ямдылышна, школ-влаклан палдарышна. Лудмаш кечын 38 градус йӱштӧ ыле гынат, йоча-влакым коштыкташ ок лий манын ойлышт гынат, зална тич калык погынен. Эсогыл пошкудо ял гычат толеденыт. Пайрем сайынак эртаралте!
Тиде мероприятий регион-влак кокласылан шотлалтеш. Тыгай пашан пайдаже изи огыл. Ик могырым: аттестацийым эртымына годым пашанам шотыш налыт, вес могырым: Валентин Исенеков мемнан школышто тунемын гын, Илья Ломберският тыште пашам ыштен гын, ме нунын лӱмыштым шарнен, пагален илышаш улына. Сандене ончыкыжым идалык коден кок лудмашге эртараш шонымаш уло.
