Васолаште — Ӱярня пайрем!

Пошкырт кундем Калтаса район Васола ялыште 26 февральыште Ӱярня пайремым эртареныт. Пайремыште уло ял калык, верысе администраций да тӱвыра аланыште тыршыше  пашаеҥ-влак, тыгак ты кундемысе мурышо да куштышо фольклор ансамбль-влак («Амче вел», «Райдем-райдем», «Кумыл», «Мурпамаш» да молат) лийыныт.

— Уремыште пеш ямле, кече онча, лум шула. Васола ял ӱмбалне марий муро йӱк шуко жап ыш лыплане. Погынышо калык тамле марий кочкыш-сийым тамлен, шокшо чай денат сийланыш. Тыге Васолаште нылымше ий почела Ӱярня пайрем эртаралтеш. Пошкырт кундемын тӱҥ онаеҥже Геннадий Пастиев тичмаш мелна кышыл да тичмаш пура корка дене Ош Поро Куго Юмылан таум каласыш, Васола ял калыклан, Калтаса район калыклан, уло марий калыклан да моло калыклан таза лияш, Ош Юмым ончык налын шогаш, ик ой дене пырля куанен илаш, вольык ютым кучаш-ашнаш, еш, пошкудо, родо-шочшо влак дене пырля илаш, тыге ончыкыжым марий йӱла пайрем-влакым эртарен шогаш сугыньлен пелештыш.

Марий-влак, шке йылмыдам, йӱладам ида мондо. Тыге ончыкыжымат унала коштын пырля илыза! — воза Вконтакте воткыл лаштыкыштыже пайремын организаторжо Радислав Зайнетдинов.
Палемден кодена: Пошкырт кундемыште Ӱярням моло деч ончычрак пайремлат.

Р.Зайнетдиновын фотожо-влак