Тӱрлӧ рольым устан модшо артист

М.Шкетан лӱмеш Марий кугыжаныш драмтеатрын артистше,  М.Шкетан лӱмеш Марий Эл Республикысе Кугыжаныш премийын лауреатше Акпарс Иванов театрын ешышкыже 2015 ийыште ушнен.

Тиде жапыште самырык артист тӱрлӧ рольым модын, драмыште, комедийыште, эсогыл трагикомедийыштат образ-влакым мастарын чоҥен.

– Акпарс, театрыш толмо корнет кушеч тӱҥалын?

– Мый Волжский район Тошнер ялыште шочынам. Эн ондак Пӧтъял школышто шинчымашым погенам, варажым Йошкар-Олашке, президент сымыктыш школышко художниклан тунемаш пуренам.

Тыглай школышто тунемше ӱдыр-рвезе-влак семынак мыйынат, урок деч вара мӧҥгӧ толын, канен, модын куржталмем шуын. Авам тидым шижын да Пӧтъял школышко пӧртылаш темлен. Тунам мый моткоч куанышым. Ала сайлан тиде ала уке…

Тыге кандашымше класс гыч школысо мер толкыныш пурен кайышым. Мероприятийлаште вӱдышылан чӱчкыдын шогалтат ыле. Эркын-эркын сценылан тунемым. Латикымше класс деч вара Марий кугыжаныш университетысе Финноугроведений институтыш тунемаш пуренам. Финн йылмым тунемынам, Финляндийышкат каяш шонымаш лийын. Актёр паша нерген тунам йӧршынак пален омыл.

– Тугеже театрыш кузе логалынат?

– 2011 ийыште Курыкмарий район Эмӓн селаште эртыше самырыктукым слётышто лийынам. Кастене творческий конкурс ыле. Кажне лужа могай-гынат марий йӱлам ончыктышаш. Ме сӱаным ямдылаш тӱҥалынна. Мыйым савушлан шогалтышт.

Репетиций годым залыште шинчыше клеткан тувыран, очкиян, шем ӱпан пӧръеҥым ужым. Тудо мемнам ончен, ала-мом пеш возгален шинчыш. Вара пален нальым: тиде Шкетан лӱмеш театрын тӱҥ режиссёржо Роман Юрьевич Алексеев лийын. Репетиций деч вара тудо мыланем Москошко актёрлан тунемаш каяш темлыш. Авам дене каҥашымек, университет гыч документым нальымат, Москосо Щепкин лӱмеш кӱшыл театральный  училищыш тунемаш каенам. 2015 ийыште Шкетан лӱмеш театрын ешышкыже ушненам.

– Театрысе икымше ролетым шарнет?

– Моско гыч толмеке, самырык артист-влаклан «Кожла кокласе омо» спектакльыште икмыняр рольым модаш ӱшаненыт. Мый Пэкын образшым чоҥенам. Тунам опытем шагалрак лийын. Кызыт тудым вес семынрак модам ыле.

Тӱҥ роль икымше гана «Элнет» спектакльыште лийын. Василий Александрович Пектеев мыланем Ветканым модаш пуыш. Григорий Петровичын образшым чоҥаш моткоч шуко тыршаш логале. Эн ондак «Элнет» романым тичмашнек лудынам. Вара тудымак руш йылмыш кусарымым шергал лектынам. Спектакльыште мурымо сцене-влак улыт. Мураш мастар омыл, сандене изиш нелылык лекте. Туге гынат вокал дене занятийлаште мураш тунемынам. Тиддеч посна Эрик Сапаев лӱмеш опер да балет театрыш скрипкам шоктымо техникым тунемаш коштынам.

Премьер деч ик кече ончыч чонем тургыжланымаш авалтыш, сцене деч лӱдмаш лекте. Мый мланде йымак порволаш, чылашт деч шылаш ямде улам ыле. Тунам йолташемын каҥашыже полшыш. «Ончылнет – тошкалтыш. Тый эн ӱлнӧ улат. Кӱзен кертат гын, вес кӱкшытыш куснет. Уке гын, тышан кодат. Шоналте, мо тылат кӱлеш», – мане тудо. Тулеч вара чонемлан куштылгырак лие.

– Тиде корным ойырен налметлан ӧпкелен отыл?

– Актёр лиям манын, нигунам шонен омыл, диктор але телевӱдышӧ семын шкемым ужынам. Театрыш толмекем, икмыняр жап шкемым вес вере терген ончаш кумыл лийын. Но тышанак кодаш пӱралтын улмаш. Таче театр мыланем паша гына огыл, а илышемын – ик ужашыже, сандене ончыкыжымат у рольым модаш, актёр семын вияҥаш шонем.

 

— Акпарс, саламлена тыйым кугыжаныш премийым налмет дене. Тиде сеҥымаш пашаштет ончыко ошкылаш эше ик шӱкалтыш, очыни?

— Чынжымак тиде сеҥымаш — сай шӱкалтыш. Пашам ынде эшеат чот тыршен ыштыман. Тау театр коллективлан, комиссийын аклымыжлан.