Татарстанысе марий-влаклан — книга пӧлек
Сентябрь тӱҥалтыште Татарстаныште илыше марий, чуваш, одо, мордва йоча-влакым сай пӧлек дене куандарышт. Шочмо йылме дене савыктыме, мотор сӱрет-влак дене сӧрастарыме у книга-влакым Татарстан Республикысе калык-влакын Ассамблейышт пӧлеклен.
Кажне комплектыш кок книга пурен. Иктыштыже марий патыр-влак нерген йомакым лудаш лиеш гын, весыште йочалан палаш кӱлмӧ 500 шомакым муаш лиеш. Книга-влакым Татарстан Республикын Президентше пелен улшо йылме-влакым аралыме Комиссий полшымо дене Татар йоча издательстве савыктен. Марий книга-влакым ямдылымаште редактор пашам Озаҥ оласе марий-влакын калыкле-тӱвыра автономийыштым вуйлатыше Людмила Мусихина шуктен.
Мероприятий-влак пайрем шӱлыш дене республикысе икмыняр районышто эртаралтыныт. Агрыз районысо школлаште да йочасадлаште пӧлекым Татарстан Республикысе марий-влакын калыкле-тӱвыра автономийыштым вуйлатыше Олег Третьяков кучыктен.
Меделеевск районышто пӧлек-влакым Менделеевск районысо марий-влакын калыкле-тӱвыра автономийыштым вуйлатыше Геннадий Мальгин пуэн.
Татарстанысе калык-влакын Келшымаш Пӧртыштышт Рушарня школын тунемшыже-влак шочмо йылме дене почеламут-влакым лудыныт.
Геннадий Мальгин, Татарстан Республикысе тӱвыран сулло пашаеҥже, Менделеевск районысо марий-влакын калыкле-тӱвыра автономийыштым вуйлатыше:
– Татарстан кундемысе Менделеевск районыштына 1272 марий еҥ ила. Тыгай пӧлекым мыланна икымше гана ыштеныт. Книга-влакым икмыняр йылме дене савыктыме. Мемнан районышко марий йоча-влаклан шӱдӧ экземплярым кондышым.
Тыгай книга-влакым Татарстанысе вес районлаш да олалашкат колтымо: Агрыз, Актаныш, Арск, Балтаси, Елабуга, Кукмор, Мамадыш, Менделеевск, Мензеля, Муслюмово.
Мемнан ялысе школыштына марий йылмым ожнысекак туныктат. Мыйын шонымаште, умбакыжат туныктыман. Тидыже вет кугезе коча-кована-влакын йылмышт. Мый тудым жаплем, марий улмем деч ом вожыл.
Элнет ялыштына шочын-кушкын, ӱмыржӧ мучко школышто пашам ыштен икымше марий калыкын поэт-баснописецше Михаил Степанович Герасимов-МИКАЙ. Тудын лӱмеш 30 сентябрьыште кугу мероприятийым эртарена. Элнет кундемышкына уло кумылын пагален ӱжына!
Уверым да фото-влакым https://mary.addnt.ru/ сайт гыч налме.
