Тӱшкаште – вий
«Кугу олаш илаш куснымеке, марий-влакым иквереш погаш чӱчкыдын шоненам. Тений шошым ты шонымаш шукталтын. Ынде «Тумывий» ансамбльын еҥже-влак дене кажне шуматкечын вашлийына, – манеш Элина Кольцова.
Элина Морко район Тойметсола ялын ӱдыржӧ. Ынде икмыняр ий тудо Москошто ила да пашам ышта. А 2023 ий шошо годсек «Тумывий» ансамбльым вуйлата.
– Лу ий утла Москошто илем. Кугу олашке илаш куснымеке, тыште илыше марий-влакым чумыраш шонен коштынам. Кодшо ий апрельыште икымше кумылан-влак погыненыт, а кызыт ансамбльыш 26 еҥ коштеш.
Чылан пашам ыштат, сандене каныш кечылаште веле вашлийын кертыт. Тыге ме шуматкече еда Российысе калык-влакын пӧртыштышт погынена. Кок шагат репетиций жап моткоч писын эртен кая, – палдарыш Элина Игоревна.
– Кузе пушым лӱмдат, тугак тудо ияш тӱҥалеш, маныт. Молан ансамбльлан лач тыгай лӱм пуалтын?
— Ансамбльын участникше-шамыч коклаште конкурсым увертарыме ыле. Ятыр темлымаш пурен, но иктыже поснак чонлан лишыл лийын да мемнам, шочмо вер деч тораште уло-влакым, ушен. Тыге «Тумывий» лӱм ойыралтын. Адакшым тиде ойсавыртышын шонымашыжат келге, сандене коктеланымаш лийын огыл.
– Костюм-влак шотышто кузерак?
– Вургемым ала-кӧжӧ шке ямдыла, ала-кӧжӧ налеш. Мутлан, Медведево районысо куштымашым шукерте огыл шынденна гын, участнице-влаклан вургемым муаш чылан полшенна.
–«Моско марий» организацийын чыла гаяк мероприятийышкыже ушнена. 10 декабрьыште Тиште кечылан пӧлеклалтше пайрем эртен, тушто калыкым куандаренна. «Этноскоп» тӱп калык-шамычын фестивальыштышт вийнам тергенна. Тушто ӱдыр-шамыч марий куштымашым шынденыт, марий калык нерген каласкаленыт, марий тӱрын мом ончыктымыжым умылтареныт.
Тыгак «Сударушка» самырык ÿдыр-рвезе-влак коклаште эртыше фестиваль-конкурсышто икымше вер дене палемдалтынна. Тыге ме конкурсын кокымшо турышкыжо ӱжмашым налынна. Тудо 2024 ий 10 мартыште Санкт-Петербургышто эрташ тӱҥалеш.
– Коллективыштыда Марий Эл гыч веле але вес кундем гычат улыт?
– Коллективыште кундемнан тӱрлö верже гыч улыт. Мутлан, Сверловск да Урал кундем гыч участник-влак коштыт, тыгак Марий Эл да Чуваш Республик гычат кумылын ушнат.
– Ончыкылык шонымашда могайрак?
– Ыштышаш пашана шуко, но тӱҥжӧ — репертуарыште улшо куштымаш-шамыч дене пашам ышташ. Тыгак кажныже вургемым шканже пога. Икгай костюмым налаш шонымаш уло. Умбакыже шке нерген кумданрак палдараш шонена.
Тиде ансамбльлан умбакыжа шке пашажым шуящ да вияҥаш тыланена!
