Тӱрлымӧ кундемна — Россий картыште

Тений пошкудо Чуваший Республикыште Тӱвыра поянлык идалыклан пӧлеклалтше «Российын тӱрлымӧ картыже» усталык проект нерген увертарыме. Тудын условийже почеш Российысе кажне регион ик кутыш куэмыште шке тӱвыра поянлыкшым тӱр полшымо дене ончыктышаш.
Россий картын ик эн изи, но тунамак ик эн сылне ужашыжым, Марий кундемым, Звенигово оласе Калык кидмастар-влакын пӧртыштын тӱрлызыжӧ-влак ямдыленыт. Надежда Майкова ден Людмила Ефремова маскала койшо тӱрыштӧ, марий тамга-влакым кучылтын, кундемнан тӱвыра поянлыкшым ончыктеныт. Тыгак картыште республикыште илыше вес калыкын орнаментыштым ужаш лиеш. Тидыже ваш келшен илымым ончыкта.
Лишыл жапыште, 85 ужашым иктеш чумырен, Российын тӱрлымӧ картше ямде лиеш. 6,7 метр кутышан да 3,1 метр кӱкшытан радынам 12 июньышто Чебоксар олаште эртарыме «Песня России» фестивальыште икымше гана ончыктат. Вара тудым вес регионлашке колтат. Акций 12 декабрьыште Москошто мучашлалтеш.

Фото-влакым https://vk.com/club187625745 тӱшка гыч налме.