Школ пагытем, салам! (йоча почеламут-влак)

ТУНЕМШЕ-ВЛАКЛАН

***
Таче ом шого ӧрын,
Темын шым ий мылам.
Ямле кеҥеж, чеверын!
Школ пагытем, салам!

***
У тунемме ийна тӱҥалын,
Йоҥгалтеш йыҥгыр йӱк чолган.
Тиде сем дечын вийым налын
Парт коклаш куанен шинчам.

У тунемме ийна тӱҥалын.
Корно ончылно — сай да раш!
Йыҥгыр икымше! Сылнын, ямлын
Ший йӱкетым шарал йырваш!

***
Икыт, кокыт, кумыт… Ой!
Мый шотлем, мучаш ок кой.
Тунемаш мый тӱҥалам,
Визытан кӱлеш мылам.

***
Икымше йыҥгыр мура мыланна,
Порын ӱжеш парт коклашке эрташ.
Лийже эре тунемаш кумылна,
Лийже тек школ эн ӱшанле йолташ.

***
Те паледа, мом ойлынем? –
Мый шукертак кугу лийнем.
Шотлен моштем, буквам палем,
Тугеже школышко каем.
«Кугу улатыс, ӱдырем», —
Шыман каласыш аваем.
Ок кӱл мылам тетла урем,
Мый ынде школышко каем!

***
Ваштар лышташ, чевер тул гае лийын,
Мемнан окнашке угыч тӱкалта.
Почеш сентябрь у тунемме ийым
Да илыш-корныш ужатен колта.

А ончылно кумда тунемме корно,
У сеҥымаш, куан — чыла лиеш.
Лудаш, возаш, палаш осал ден порым —
Чыла лач тиде кечын тӱҥалеш.

***
Эх, школыш чыланат
Каят, мыят вашкем.
Капем изи гынат,
Сумкам нумал моштем.

***
Тиде кечым шукертак вучем,
Мый тыгай шкетын омыл улмаш.
Да пеледыш аршашым кучен,
Таче мый толынам тунемаш.

Тиде кече пеледыш пушан,
Чон куан дене темын, ласка.
Мый лийнем аваем гай ушан,
Мый лийнем ачаем гай мастар.

Поро туныктышем да школ,
Те вашлийза эн шерге унам.
Таче улыт йолташ-влак мочол,
Таче мый тунемаш толынам!

***
Икымше йыҥгыр, икымше класс!
Тиде пайремым вученна эр-кас.
Сылне вургемым, тетрадьым, книгам
Налын шукертак мыламже авам.

Сугыньым пуыш ачам тунемаш,
Ушым погаш, сай айдеме лияш.
Икымше йыҥгыр, икымше класс!
Тиде пайремым вученна эр-кас.

***
Идым тылзе, шыже толын.
Шыже ден пырля пайрем
Койына ме пеш моторын,
Куаналын шер ок тем.

***
Ынде мыланем огеш кӱл модыш.
Шӱжаремлан лучо пӧлеклем.
Кушто? Мо? Кунам? – пеш шуко йодыш,
Тунемам, вара чыла палем.

***
Авай аршашым кучыктыш мылам
Да кондыш мыйым школыш, ужатен.
Каласыш, тыште — кокымшо авам.
Тудлан пеледышемым пӧлеклем.

***
Кузе шотлаш, кузе возаш,
Кузе ушан, виян лияш?
Вашке чыла пален налам.
Садланак школыш толынам.

***
— Вучалте мыйым, изаем,
Мый школыш тунемаш мием!
— Эх, шольым, пеш изи улат,
Кузе сумкажым нумалат?
Тый лучо йочасадыш кай —
Кугу лият, чылт мыйын гай…
— Кугу лиям! Вара эше
Сумкатым нумалаш полшем!

ЙОЧА-ВЛАКЛАН СУГЫНЬ

***
Пагалыме икымше класс,
Кӱлеш тиде ойым палаш:
Те тыршыза эр кынелаш,
Ида мондо шӱргым мушкаш.

Тунам вара омо йомеш,
Тыге кумылда саемеш,
Тунам вара, ойлышт кеч-мом,
Урокышто тӱткыш ок йом.

Книгатым, сумкатым арале,
Арулыкым ынде пагале.
Вургем ден сынетым эскере,
Лияш лавыран огеш йӧрӧ.

Урок гын, ит воштыл, ит лӱшкӧ,
Ӱстелым, пӱкеным ит шӱкӧ.
Ит сыре, лий поро чонан
Да тырше полшаш чылалан.

Пагалыза школысо жапым,
Йӧратыза туныктышо-влакым!

Тыгайрак мемнан сугыньмут:
Тӱняште шканет корным му.
Ит мондо ойнам тый, йолташ,
Чолга лий, тӱҥал тунемаш!

Автор — Алена Яковлева.