«Ший полан» – Яранскыште
Кодшо арнян Йошкар-Оласе «Ший полан» фольклор ансамбль Киров кундем район-влак кокласе «Марий сем» кумшо марий фольклор фестивальыш кокымшо гана миен коштын. Тылеч ончыч нуно 2020 ийыште тиде пайремыште лийыныт улмаш.
– Тений Ольга Владимировна Скоробогатова ты фестивальыш йыҥгыртен ӱжӧ, вара положенийым колтыш. Пайрем кок ужаш дене эртаралтын. Ондак декоративно-прикладной искусство да кочкыш выставке пашам ыштеныт.
Икымшыште кидмастар Зоя Танерова ден тунемшыже – мый, Людмила Купсольцева, тӱрлымӧ пашана-влакым ончыктенна. Кокымшо ончер – марий кочкыш. Мемнан ансамбльнан ӱдыржӧ-влак сийым ямдыленыт. Кажныжым палемден кодынем: Галина Александрова, Любовь Александрова-Ягодова, Клавдия Вишнякова, Зоя Танерова да мый.
Ик пайремат гаромонь деч посна ок эрте, сандене мероприятийыш мийыше-шамыч дене мурен-куштенна, ямдылен намийыме кочкышна дене калыкым сийленна.
Кокымшо ужаш концерт семын эртен. Тушто Киров кундемын районлаж гыч ансамбль ден мурызо-влак лийыныт. Марий Эл гыч ме да Оршанке район Кугунур селасе «Какшан сем» ансамбль миенна.
Киров кундем калык мемнам шке родыжо гай ончен. Шуко еҥ дене палыме лийынна, концерт дене мияш йодмашат ятыр пурен. Лишыл жапыште уэш вашлийына манын ӱшанена.
«Ший полан» ансамбльым диплом дене палемденыт, а ончер участник-шамычлан таумут кучыкталтын,– каласкалыш Людмила Валерьевна Купсольцева.
«Ший полан» ансамбльын архивше гыч налме фото.
