Одо марий-влак нерген книга
21 февральыште Одо кундем Ижевск оласе Келшымаш пӧртыштӧ «Марийцы Удмуртии: историко-этнографические очерки» книган презентацийже эртаралтын.
Марий Эл, Татаранстан, Башкортостан республиклште, Свердловск ден Киров кундемлаште илыше марий-влак нерген тӱрлӧ савыктышым муаш лиеш. Но Одо кундемысе марий-шамыч нерген книга уке гаяк.
Мер ушем еҥ-влак коклаште историко-этнографический сынан книгам чумырымо нерген шонымаш шукертак лийын. Ты пашаш активист, этнограф, историк, марий школла гыч туныктышо-шамыч, тоштер пашаеҥ, марий тӱвыра рӱдер пашаеҥ-влак да тулеч молат ушненыт.
Тиде шонымашым илышыш шыҥдараш полшымо пашаште кугу надырым «Ӱжара» самырык-влакын марий ушемышт полшен. Нуно грантым сеҥеныт. Тыгак тиде книгам лукмаште марий мер толкынын ончылеҥже Анатолий Родыгинынат надырже уло.
Книгаште тӱрлӧ сынан материалым муаш лиеш, мутлан, очерк, йӱла да еш альбом гыч фото-влакым.
Тиде книгам 2021 ий шошымак калыклан ончыкташ шоненыт улмаш, но черлан кӧра, событийым ик жаплан ӧрдыжыш шӱкалыныт, сандене презентацийым 2022 ийыште веле ыштеныт.
