Одо кундемыште — марий ял

Автор — Олеся ИСКАКОВА.

Шочынам, кушкынам да кызытат илем мотор, сылне вершӧрыштӧ – Одо кундем Грак район Марий Вожай ялыште.

Ялемын шочмыж нерген ик легенде дене палдарем.

400 ий утла ончыч тиде верышке марий-влак толын лектыныт. Вершӧр пешак ямле – чодыран, тыштак эҥер йоген кая. Еҥ-влак тышан ялым ышташ шонен пыштеныт.

Жап эртымеке, тышке одо-влак толын лектыныт, нуныланат тиде вер пешак келшен. Но кок калык пырля илен ок керт, иктыжлан вес верым кычалман. Одо-влак шке мландыштышт улмылан кӧра марий-влакым поктен колтынешт улмаш. Но марий-влакынат тышеч кайымышт шуын огыл. Кок калык коклаште ӱчашымашым эртараш пунчалым лукмо. Марий-влак да одо-влак икмыняр патырыштым ойыреныт да ик кечын имне сапкеремым шупшын таҥасеныт. Кӧ сеҥа, тудо тышан илаш кодеш.

Марий-влак сеҥеныт. Яллан Марий Вожай лӱмым пуэныт, а одо-влак кум-ныл меҥге ӧрдыжтырак вӱд ваштареш шке ялыштым ыштеныт да Одо Вожай манын лӱмденыт.

Изи улмем годым Одо Вожайыште икмыняр сурт кодын ыле, но таче кечылан тушто ямле садер, мотор пӱя, кугу пушеҥге-влак гына ялын лиймыж нерген палдарат.

А мемнан Марий Вожай ялыштына 134 сурт тӱзланен шинча. Кыдалаш школ, йоча сад, тӱвыра пӧрт, почто, кум кевыт да фельдшерский пункт верланеныт.

Кызыт ялыштына мланде паша тургым кая – пареҥгым шындат, шурным ӱдат.