Ныргындасе «Висвис»

Одо кундемыште ий еда «Золотой Италмас» йоча усталык конкурс эртаралтеш. Тыште ӱдыр-рвезе-шамычым ушышо коллектив-влак мастарлыкыштым ончыктат.
Тений ты конкурс Российысе калык тӱвыра поянлык идалыклан пӧлеклалтын. Тудо кок ужаш дене эртаралтын, 28 февраль гыч 9 апрель марте шуйнен. Икымше этапыште кокнкурслан видеом ышташ кӱлын. Эн сай пашам «Калык музык», «Калык мурым мурымаш», «Калык куштымаш», «Калык тӱвыра» да «Цирк» номинацийлаште палемденыт.
Эн ойыртемалтше коллектив-влак финалыште таҥасеныт. Тудо 9 апрельыште Одо кундемысе калык усталык пӧртышто эртаралтын. Конкурсыш Одо кундемысе олала ден районла гыч, тыгак Пошкырт кундем гычат уна-влак толыныт.

Чылаже 70 усталык коллектив таҥасен. Ныргыдасе тӱвыра пӧрт пеленысе «Висвис» фолькльор ансамбль «Калык йӱла» номинацийыште 3-шо степенян лауреат лӱмым сулен.

– Ме ожнысо калык вургемым ончыктенна, йыдалым чиен, кандырам пунен куштенна. Ӱдыр-рвезе-влак тыгай кугу сценыште икымше гана лийыныт, моткоч куаненыт, моло коллектив-влакымат уло кумылын онченыт. Фестивальым эртарыше-влаклан моткоч кугу тау, – каласкалыш Ныргында тӱвыра пӧртын художественный вуйлатышыже Надежда Токмурзина.