«Мый кертам! Мый сеҥем!»
Шукерте огыл соцкылыште увер-влакым ончен шинчышемла, оҥай афишым ужым. «Тушко миен толаш сай ыле», — шоналтышым. А икмыняр кече гыч ӱжмаш-серышат чоҥештен тольо. Но ик ситыдымаш, ты айдемым лично ом пале. Творческий вашлиймашыш тыге миен шинчаш йӧндымӧ. Мом ышташ? Палыме лияш!
Соцкылыште лаштыкшым ончен лекмеке, моткоч чолга айдеме манын вигак умылышым.
– «Марий памаш» ансамбльыш 2018 ий годсек коштам. Тушко ушнаш шукертсек шоненам, но тунам йӧн лектын огыл. «Марий памаш» – кумдан палыме да чапланыше ансамбль. Нунын выступленийышт годым чонем шолшо вӱд гай шолын, кузе сайын участник-влак уло мастарлыкыштым почын ончыктеныт,- палдарыш Алёна Антонова.
Алёна кушта веле огыл, тыгак ансамбльыште солист семын мура. Ансамбльын ешыш ушнымеке, поэзийлан шӱмаҥын. Тидлан эше ик амал лийын – ешышкыже ойго вучыдымын толын.
«Ойгыш вошт куснаш огыл манын, чон йодмо почеш шонымем возаш тӱҥалынам. Моштем манын шонен омыл. Шукыштлан шочмо кече пайрем лӱмеш почеламутым возенам. Варарак мурылан шомакым сераш йодыныт.
Возаш шичме деч ончыч айдемын койышыжым эскераш йӧратем, мом кутырмыжым колыштам. Пел шагатыште почеламут корно шочеш. Марла да рушла возем.
Творчестве шкаланже корным эре муэш. Южгунам йӱдымат почеламут корныла вуйышко толын пернат да возен пытарымешке, «огыт колто».
А кызыт – вием шижам, да калык ончыко аклаш лукнем», — палдара Алёна.
– Сборникым чумыраш шонымаш уке?
– Кок ий ончыч ты пашам ышташ темленыт ыле. Тунам мый воштылынам веле — тыглай гына возем манын шоненам.
– Творческий вашлиймашым эртараш мо кумылаҥден?
– Тиде творческий вашлиймаш — мылам эн кӱлешан! Психологический аутотренинг семын манаш лиеш. «Мый кертам! Мый сеҥем !» манын шкаланем ойлынем.
Эшежым тиде пашам дене ӱдырамашын кӧргӧ шонымашыжым, тӱрлӧ могыр гыч ончыктынем. Жап эртымеке, кугу проектым ышташ шонымаш уло.
Алена Морко район Нӧрепсола ялеш шочын, Шернур вел Торешкӱвар ялеш кушкын, Медведево район Руш Кукмарий школышто тунемын.
Кызыт Йошкар-Олаште ила, Т. Евсеев лӱмеш национальный тоштерыште пашам ышта.
