Марий, татар, чуваш гына огыл…
У Торъял район Эшпай ялын ӱдыржӧ Людмила Новосёлова школышто тунеммыж годсек кидпашалан шӱман. Труд урокым вӱдышӧ Людмила Николаевна Третьякова изи ӱдырым кочкаш ямдылаш, ургаш, мотор деч мотор салфеткым пидаш туныктен.
Кызыт Людмила чон йодмо пашам умбакыже шуя, тудо курчак-влаклан тувырым тӱрлен урга. Но тувыржым тыглайым огыл, а тӱрлӧ калыкын.
Самырык ӱдырамаш 30 утла калыкын национальный тувырыштым ямдылен. Нунын кокла гыч татар, чуваш, руш, украин, армян, литва, мордва, казах, чукоткысо, узбек, цыган, испан, япон, Бразилийысе, Эстонийысе да шуко-шуко молат. Но, мутат уке, коллекцийын тӱҥ верыштыже – марий вургем. Олыкмарий, курыкмарий, эрвел марий, урал марий… Марий калыкын тӱшкан илыме кажне кундемым авалтен, курчак полшымо дене вургем ойыртемым мастарын ончыктен.
Тӱрлӧ калыкын вургемжым ямдылаш куштылго огыл, вет эн ондак тиде калык нерген шукырак пален налман, шымлыман. Но Людмилам тиде огеш лӱдыктӧ. Тудо вургемым ямдылыме деч ончыч калыкын тӱвыражым шымла, шуко лудеш.
Кызыт Л.Новосёлован кок выставкыже пашам ышта. Иктыже – С.Чавайн лӱмеш калыкле книгагудышто, весыже Кужэҥерысе тоштерыште.
«Курчак-влак полшымо дене эн ончычак йоча-влаклан шуко калыкан Российын моторлыкшым, тӱвыра поянлыкшым ончыктымо шуэш. Тыгак вес эллаште илыше калык-влак нергенат палышт манын шонем», — каласыш Л.Новосёлова.
Людмилалан тиде кӱлешан пашаштыже Йошкар-Оласе Сокыр-влакын ушемышт кугу шӱкалтышым ышта. Ты ушемыште тӱрлӧ мастер-классым, конкурсым эртарат, кидпашалан утыр шӱмаҥдат. Марий Элыште гына огыл, Россий кӱкшытан конкурслашке ушнаш полшат. Ик эн кугу сеҥымашыжлан «Абилимпикс» республикысе конкурсышто «художественная вышивка» компетенцийыште икымше верым налмыжым шотлыман. Россий кӱкшытыштӧ эртаралтше тиде конкурсыштак кокымшо верыште лийын. Тылеч посна Людмила спортивный туризм, ӱстембалысе модыш-влак, дартс дене таҥасымашлаш ушнен.
Кидмастарын тачысе кечылан ик кугу шонымашыже уло: посна ончерым ышташ. Людмила, шонен пыштымыда шукталтше, кӱлешан сомылда куаным кондыжо, курчакда-влак дене марий калыкнам умбакыжат чапландарыза!
