Марий кундемын ончыкылыкшо
3 ноябрьыште Э.Сапаев лӱмеш опер да балет театрыште Калык-влакын икоян улмо кече да Марий Эл Республикын шочмо кечыже вашеш кугу пайрем концерт эртаралтын.
Наталия Михайлова, И.С.Палантай лӱмеш тӱвыра да сымыктыш колледж пеленысе йоча сымыктыш школышто хор пӧлкам вуйлатыше, туныктышо, дирижер:
– Тиде кечын ик эн кугу пӧлекым республикысе музыкальный школлаште тунемше ӱдыр-рвезе-влак ямдыленыт. Чумыр марий йоча хор, марий йоча оркестр, марий кӱслезе ансамбль руш да марий композитор-влакын совет жапысе да кызытсе кумдан палыме произведенийыштым йоҥгалтареныт. Чумыр марий йоча хор оркестрын, кӱзлезе ансамбльын шоктымышт, тыгак фортепиано да марий тӱмыр йӱк почеш мурен.
Александр Сергеевич Андриановын вуйлатыме оркестрже да Елизавета Ивановна Васютинан вуйлатыме кӱслезе ансамбльже посна программе-влакым ончыктеныт.
Тыгаяк концерт тений кеҥежым эртаралтын. Тунам 250 наре йоча иктеш чумырген гын, тений 400 утла йоча сценыште мастарлыкшым ончыктен.
Тиде концертлан йоча-влак эн ончыч шке школлаштышт ямдылалтыныт. Концерт деч икмыняр кече ончыч гына нуно, театрыште погынен, репетицийым эртареныт.
Марий кундемын икшывыже-влак волгыдо ончыкылыкна улмым шке мастарлыкышт дене эше ик гана пеҥгыдемденыт да Шочмо мландым йӧраташ кӱлмӧ кумылым кажне чонышто тарватеныт.
Евгений Никифоровын фотожо-влак.
