Марий концертым — Ютубыш

У ий каныш жапыште районлаште ятыр концерт эртаралтын. Мыят, декрет пагытем сӧрастараш манын, Шернур посёлкысо тӱвыра полатыште лийше концертыш кайышым. Тушко ола гыч «Чоным почын мурена» проект толын ыле. Концерт тӱҥалме деч ончыч мыйын воктекем йошкар марий тувырым чийыше самырык рвезе толын шинче. Лӱмжым йодде шым чыте. «Меня зовут Дима» – лие вашмут. Тетла нимом йодын шым шукто. Концерт тӱҥале веле, чолга рвезе телефон ден штативым сакен, сцене ончыко куржо, сем почеш таваш тӱҥале. Дима дене пырля ӱдырамашат кушташ лекте. Тыге нуно концерт мучко капыштым лывыртылыныт.
Концерт пытымеке, рвезе дене лишкырак палыме лийым. Шкеже тудо Киров кундем гыч. Шернурыш ял калык дене лӱмын машинам тарлен толыныт. Саде ӱдырамаш рвезылан палыдыме улмаш. Видеом рвезе шке Юбут каналжылан войза. Тудо лаштыкыштыже тӱрлӧ марий мероприятийым вераҥда. Тиде концерт гыч ужашымат тушко шындаш сӧрыш.