Марий калык погын деч мом вучат?

Марий калык погынын делегатше-влак дене умбакыже палдарена.

Ирина Тойгильдина (фотошто пурла гыч икымше):

— Ме Санкт-Петербург ола да Ленинградский область гыч нылытын миена. Нылытынат тӱрлӧ секцийыште лийына. Молан манаш гын, мӧҥгеш пӧртылын, Санкт-Петербург да Ленобластьыште нине йодыш-влакым кумданрак ончалына да мом кертына, тудым решатлена. Мемнан икмыняр йодмаш уло, но тиде йодмашым кызытеш огына ойло, погынышто гына. Молан манаш гын лийын кертеш тыге, мемнан да моло тӱрлӧ вер гыч толшо делегат-влакын йодышна икгайрак лийын кертеш. Сандене тидын шотышто нимом каласен огына керт.
Тиде съезд дечын мом вучена? Тӱрлӧ йодышым решатлыме сай корным, алгоритмым вучена. Тӱрлӧ вере илена, мемнан проблеме иктак, но кажныже шке семын тудым решатла. Лийын кертеш туге, Пошкырт кундем гыч але Марий Эл гыч марий-влакын йылме йодыш але тӱвыра дене кылдалтше йодыш шке семын решатлалтеш. Ала мыланна тиде решений келшен толеш? Ончалына.
Эше, конешне, съездыште шуко еҥ дене палыме лийме шуэш. Ончыкыжымат пырля пашам ышташ кумыл дене миена.

Фотошто Санкт-Петербург да Ленинградский областьысе землячествын еҥже-влак, нунын кокла гыч кумытынжо: Лариса Арламова (шола гыч кокымшо), Елена Таникова (шола гыч кумшо) да Ирина Тойгильдина — Марий калык погыныш мият.