Марий йылме лагерь

10-15 июльышто Килемар район Церкӹсола (Арда) селаште «Раздолье» туркомплексыште марий йылме лагерь эрташ тӱҥалеш. Тидын дене организатор Лариса Арламова палдарыш.

Тыгай лагерьым ышташ шонымаш кушеч лекме нерген йодмемлан, ӱдырамаш тыге вашештыш:
–  Лингвист-полиглот Александр Блинов дене  Интернетыште шочмо йылме-влакым арален кодымо да вияҥдыме шотышто пашам ыштыше платформышто палыме лийынна. Тудо ятыр йылмым палымыж деч посна, шочмо чуваш йылмыж дене кылдалтше тӱрлӧ мероприятийым эртара. Иктыже «11-мӗш Хавал уйлӑх» чуваш йылме лагерь. Мыят тушко 2021 ийыште мийышым. Лач тушто лиймеке, тыгайрак сынан, но марий лагерьым ышташ шонымаш лекте.
А вара А.Блинов сайынрак шоналташ темлыш да полшаш сӧрыш. Тыгак моло чуваш организатор-влакат кумылаҥыныт.
Шонен-вискален, пашам ышташ тӱҥална.
Тиде школын тӱҥ шонымашыже: марий йылмым тунемаш кумылан-влакым чумыраш да кажне ийын тыгай вашлиймашым эртараш. Тыгак тӱрлӧ тренинг, семинар полшымо дене тӱвырам, йӱлам шымлаш.
Кызыт шукыжо  ямдылалтме пашам  шуктена.

Кумылан-влакым мемнан деке ушнаш ӱжына.