Колумб лӱмеш сылнымут пайремыште…
Ий еда кеҥежым Морко районышто марий поэт Валентин Христофорович Колумблан пӧлеклалтше «Колумб лудмаш» сынымут-сылнысем пайрем эртаралтеш. Тыште вес регионласе да марий кундемысе ола ден районласе конкурслаште ойыртемалтше-влак мастарлыкыштым ончыктат. Тений ты фестиваль-конкурс Морко район Чавайнур ялыште С.Г.Чавайн лӱмеш сылнымут да этнографий комплекс пелен эртаралтын. Конкурсышто тӱрлӧ кундем гыч толшо йоча ден кугыеҥ-влак Валентин Колумбын, Василий Крыловын сылнымутыштым лудыныт, нунын почеламутыштлан возалтше муро-влакым йоҥгалтареныт, шке возымо сылнымутышт дене палдареныт.
«Колумб лудмаш» тений марий сылнымутлан негызым пыштыше писатель Сергей Григорьевич Чавайнлан 135 ий теммылан, поэт Василий Васильевич Крыловын шочмыжлан 70 ий темме лӱмеш эртаралтын.
Конкурсышто чылаже 5 ияш гыч 65 ияш марте 80 наре участник почеламут лудмаште да мурымаште таҥасен. Нуно Татарстан кундем Арский район гыч, тыгак Марий Эл Республикын районлаже (Советский, Медведево, У Торьял, Волжский, Морко) гыч лийыныт.
Лудмаш кечын уна-влаклан С.Г.Чавайн лӱмеш сылнымут-этнографий комплексыште экскурсий эртаралтын, ончер ден мастер-класс-влак лийыныт, йоча-влаклан модаш келыштарыме площадке пашам ыштен. Пайремыште тӱрлӧ кундем гыч толшо усталык коллектив ден мурызо-влакын концертышт лийын.
Колумб лудмаш самырык тукымым марий йылмым да сылнымутым йӧраташ таратыме кумыл дене эртаралтеш. Ты шотышто лектыш уло: сылнымут пайремыш йоча-влак ятырын толыныт. Нунын марий поэзийым шижаш да умылаш тыршымышт куандара. Поснак почеламутым шке возышо-влак сылнымутнан ончыкылык ӱшанже улыт. Колумб лудмаште нуно посна тӱшкаште таҥасеныт, шке возымо пашаштлан акым налыныт. Тидыже самырык-влакым марий улмышт дене кугешнаш да утларак возаш тыршаш кумылаҥда манын ӱшанена.
Фотошто: Пӱртӱс лоҥгаште — тамле сий. Участник-влак шудо чай дене да тӱрлӧ тутло кочкыш дене сийлалтыт:
Регион-влак кокласе «Колумб лудмаш» сылнымут да сем аршаш фестиваль–конкурсыш йоча-влакым ныл ияш гычак ямдылен шогем. Теният Морко 1-ше номеран йочасад гыч Алена Александрова Валентин Колумбын «Йоча ден кече» путырак кужу почеламутым, Эргубаева Аделина В.Колумбын «Йӱд кушто ила?» почеламутым йонгалтареныт. Алена – 1-ше вер дене, Аделина – 3-шо вер дене палемдалтыныт. Нунылан умбакыжат кӱкшытыш шуаш тыланем.
Ты пайремыш толшо уна, участник-влакланат келшен, шонем. Тӱрлӧ площадке, мастар-влакын выставкышт, концерт лийыныт.
Морко книгагудо пашаеҥ-влак икшыве-шамыч дене изирак викториным эртареныт, ойыртемалтше-влакым пӧлек дене палемденыт, мотор фотозоным ямдыленыт.
Йошкар–Оласе 3-шо номеран школын технологийым туныктышыжо, Людмила Ионовна Матвеева, кызытсе саманлан келшыше кидшолым, шӱйаршашым (подвеске), аралтышым (булавкым) выставкыш конден. Налаш кумылан-влакат лектыныт.
Тоштерыште тыршыше-шамыч семӱзгар дене шокташ туныктеныт. Марий книга савыктыш книгам ужалаш конден.
Тутло когыльымат, шере кочкышымат ужалышат койыныт. Тыгак садвечыште, яндар пӱртӱс лоҥгаште кочкышым ямдыленыт, тушто сий путырак тамлын чучын. Кечыжат пеш мотор ыле. Икманаш, пайрем поро шарнымаш дене кодын. Организатор-влаклан кугу таум ойлена, – Инна Алексеева. 
А.Яковлева.
Авторын фотожо-влак.
