Коҥган пайремже

Коҥга — пöртын шÿмжö, ойлат калыкыште. Арам огыл коҥга дене ятыр йÿла кылдалтын. Мутлан, шочшо азам пöртыш пуртымеке, эн ончыч коҥга ÿмбак пыштеныт. Оръеҥ сÿан кечын суртшо гыч тулшолым наҥгаен.
Марий калыкын ик пайремат мелна деч посна ок эрте. А иктаж кугу айо годым мелнам, туарам, пулашкамуным, кöршöкеш шындыме пареҥгым — чылажымат коҥгаште кÿктат. Очыни, кугезына-влак тиде «шÿмын» кÿкшö акшым умыленыт да тауштымо семын «Коҥга пайремым» шонен луктыныт.
Тудым 12 февральыште республикнан икмыняр районыштыжо: Кужэҥер, У Торъял да Шернурышто — палемдат.
Ты пайремым Республик кÿкшытыштö конкурс семын эртарат, но пандемийлан кöра тений вашталтыш пурен. Сандене моло мероприятий семын коҥган пайремжым онлайн йöн дене эртарат. Кумылан-влак да тӱвыра пашаеҥ-шамыч йÿла дене кылдалтше видеом войзен колтышаш улыт. Конкурсым пайрем кечын, 12 февральыште, палемдат.
Эртыше каныш кечын Кужэҥер районысо Йывансола ялысе «Мурсескем» ансамбльын участникше-влак, Каменщиковмытын суртыштышт погынен, пайремлан видеом ямдыленыт. Озавате Вера Алексеевна мелнам кÿэштын, коҥгаш пареҥгым шынден да моло сийым поген, уна-влакым вашлийын. Тыгай сынан видеом нуно конкурсыш колтат.
Ме, самырык-влак, шуко марий йÿлам огына пале. Видео полшымо дене шинчымашнам пойдараш сай йöн пуалтеш.
Тек йÿлана аралалтеш!
Фотом ансамбльын архивше гыч налме.