Книга – тудын йолташыже

Кызытсе йоча-влак деч «Кӧ лияш шонет?» манын йодат гын, вашмут тыгайрак лиеш: «Блогер, менеджер, таргетолог» да тулеч моло. Тыгодым туныктышо, бухгалтер але книгагудо пашаеҥ лияш шонышо уке гаяк. Тыгай профессийыште пашам ыштыше еҥ-влакым поснак пагалаш кӱлеш. Садлан таче Шернур район Кугу Сердыж книгагудышто пашам ыштыше Эльвира Гусева дене палыме лийына. Ялысе книгагудышто кузе пашам ыштат, рашемдена.

– Мый 2014 ий годсек книгагудышто пашам ыштем. Ты коклаште кум ий декретыште йоча дене шинченам. Тӱрлӧ нелылык уло гынат, паша келша. Кажне паша вер шкешотан, сайжат да удажат уло. Кеч-могай сомылым уло кумыл ден ыштет гын веле тудо вораҥын кая.

КУЗЕ ПАША КАЯ?

Кызытсе саманыште ялласе книгагудышто ышташ куштылгыжак огыл. Лудшо-влак шагалын улыт, самырык-влак эре телефон да компьютер дене пайдаланат. Но лудаш йӧратышыже садак книгагудыш коштыт. Тидыже куандара!

Школ программе дене изирак класслаште тунемше-влаклан «читательский дневникым» ышташ пуат, садлан толде огыт керт.

Йоча-влакым южгунамже кузе лудаш кумылаҥдаш манын, ӧрат веле. Книга почеш тӱрлӧ викториным эртарена, тыгак сайтыште онлайн-йодыштмаш але онлайн-викторине йӧным кучылтына. Изирак ийготан икшыве-шамыч дене йочасадыште йомак почеш театрализацийым эртарена. Шуко мероприятийым клуб пашаеҥ-влак дене пырля ыштена.

Марий йӱлам, шочмо йылмым, шке вер-шӧрым аклаш да йӧраташ кумылаҥден шогена.

Кугурак ийготан да илалше-шамычат книгалан коштыт. Пӧръеҥ-влак шукынжо детективым да приключенийым лудыт, ӱдырамаш-влак – илыш нерген ойлымаш ден романым.

Газет ден журнал подписке кызыт пеш шагал, но еҥ мемнан дене чылажат уло манын палат. Толын лудыт, мӧҥышт лудаш налын каят.

У ВЕР

Ӱмаште шыжым книгагудылан верысе ФАП зданийыште пӧлемым пуэныт. Кызыт мый пеш волгыдо, шокшо верыште пашам ыштем. Ончыч пу пӧртыштӧ паша верна лийын. Тушто шокшо лийже манын, шке коҥгаш олаташ логалын. Туге гынат чатлама йӱштӧ годым кылмен шинченна. Пурак ден шикшат «йолташна» лийын шуктеныт ыле. Тыгай сӱрет кажне гаяк ялысе книгагудышто вашлиялтеш.

Но кызыт нимогай ӧпкемат уке. Тыште пеш сай, лудшына-влак гына коштышт.

КНИГАМ САКАЛЕН…

Вес яллаште илыше кугурак ийготан книга-йолташна-влак деке «книгоноша» акций дене коштына. Тӱҥ шотышто марий книга-влакым йодыт. Кеч руш школышто тунемынам гынат, шкежат марла произведений-влакым лудаш йӧратем.

ИЛЫМЕ ВЕР ДА ПАША

Олаш але райрӱдыш пашаш каяш кумылем уке ала-мо. Мый ялыште шочын-кушкынам да мыланем тыштак сай. Нигуш ом кай манашат огеш лий, илыш йыжыҥан.

Чыланыштын чыла саяк лийже: пашаштат, илышыштат!

Эльвиран архивше гыч налме фото.