Кеҥеж умыр касым марий муро ден калык семӱзгар йоҥгымо семым колыштын эртареныт…
Лач тыгай лийын южо еҥын теҥгечысе касше. Вет нуно «Эҥервалне муро сем» творческий вашлиймашыш миен коштыныт.
Кызытсе саманыште марий семӱзгар, ондаксе марий калык мурым йоҥгымым колаш шуэн логалеш. Туге гынат тыгай йӧн уло.
Теҥгечысе мероприятийыште Иван Каменщиков семӱзгар-влак дене тӱрлӧ семым йоҥгалтарен, Линда Николаева мурым мурен, а Анастасия Березина чыла тиде вашлиймашлан вуйын шоген.
Фотом ончалын, касын поро кумылан шӱлыш дене эртымыжым шижаш лиеш.
Теат тыгай вашлиймашыш ушнаш шонеда гын уверым эскерыза. Организатор-влак лишыл мероприятийым август тылзыште эртараш палемденыт.
Фото ден видеом Алёна Яковлева колтен.
