Кӱчыкэҥерысе «Муро сем»
Морко район Кӱчыкэҥер тӱвыра пӧрт пеленысе «Муро сем» ансамбльым 1974 ийыште Петр Павлович Эчейкин чумырен. Тудо Марий Эл тӱвыран сулло пашаеҥже, тале семӱзгар мастар. Уста айдемын суапле пашажым кызыт ты тӱвыра пӧртын вуйлатышыже Ирина Валериановна Кутузова шуя. Ансамбль кок тӱшка дене пашам ышта. Иктыже – кугурак-влак, весыже – йоча-шамыч.
– Кугуракшат, изиракшат ансамбльыш уло кумылын коштыт. 10 наре кугыеҥ да тынарак ӱдыр-рвезына улыт. Йоча-влак шиялтыш, шун шӱшпык, шӱвыр, олым шӱвыр, тыглай тӱмыр, оҥа тӱмыр да моло семӱзгар дене куанен шоктат. Профессионал семын шокташ нуным Эҥерсола школышто музыкым туныктышо Наталья Степановна Павлова туныкта, а мый организатор пашам виктарем, – каласкалыш И.Кутузова.
Ирина Валериановнан ойлымыж почеш, ансамбль таче мартеат уста кидмастар, чапланыше музыкант Петр Павлович Эчейкинын ыштен кодымо семӱзгарже-влакым вашталтыде кучылтеш. Тиде – поро шарнымаш, марий семӱзгар мастарын пашажым аклымаш да пагалымаш.
«Пашаштыда могай нелылыкым шижыда?» манын йодмемлан Ирина Валериановна тыгерак вашештыш:
– Кызыт чыла шке вий дене ышташ логалеш. Вургем шотышто нелылык уло. Тувырнажат проста, тоштырак, но у чиемым ямдылаш йӧн уке. Илаш, пашам ышташ толашена. Кумыл волымо годым ансамбльысе чолга вате-влакым, йоча-шамычым ончен куанем. Нунылан калыкнан тӱвыражым аралымаште да вияҥдымаште тыршаш тынаре келша! Йоча-шамычше «Ирина ака, айста репетицийыш погынена» манын колтат, кажне гана куанен клубыш куржыт… Тиде нимо деч шерге. Лачак тиде вийым пуа да нелылыкым мондаш полша.
А.Яковлеван да И.Кутузован фотошт.
