Илыше огыл, но сӱретла

Шукерте огыл Интернет тӱняште Российысе ола-влакым айдеме сын дене ончыктымо сӱрет-влак кояш тӱҥальыч. Олана-влак ӧрыктарыше вургеман, тӱрлӧ кумылым ончыктышо ӱдырамаш, пӧрьеҥ, шоҥго, самырык, йоча лийыч… Варарак – Марий Элысе эҥер-влакат мотор ӱдыръеҥыш «савырнышт». Кажне тыгай сӱрет пелен «нейросеть сӱретлен» манын возат. Тыгодым шуко еҥын йодыш шочеш: кӧ вара тиде мастар нейросетьше? Кушто ила? Кузе тыге сӱретленже мошта?
Айста рашемдена.
Но ончыч икмыняр олам ончалаш темлена (Midjourney системыште ыштыме):

Нейросеть пӱртӱслӧ огыл уш-акылым (шке ыштыме але искусственный интеллектым) вияҥдыме сомыл дене кылдалтын. Тудо компьютерым айдемын вуйдорыкшо шонкалыме семынак «шонаш» туныкта. Теве «Яндексын» Алисаже кузе кутыралтен колта, колында? Айдемак ман шонет. Я турлӧ техникым налаш – нунат айдеме йӱк дене пелештен моштат (тӱҥ шотышто кызыт  Маруся «пашам ышта»). Кузе тиде ышталтеш, шукынжо паледа, докан: пӱртӱслӧ огыл уш-акыл (искусственный интеллект) йӱкым колыштеш, тудым текстыш кусара, вара рашемда (але умыла манын кертына), умбакыже келшыше вашмутым кычалеш да тудо текстым йӱкаҥден ойла. Чылажат тиде ик пычырик татыште ышталтеш.

Але марте искусственный интеллектын йӱк дене пашам ыштымыжым колында гын, ынде тудын сӱретше-влакым ужын кертыда. Ӧрыктара, но сӱретче семын саде интеллектет тӱнямбалне але марте «палыме лийын» шуктен. Сӱретче-влаклан эртаралтше ик конкурсышто лачак нейросетьын сӱретше сеҥышыш лектын улмаш (фотошто саде сӱретым ончалын кертыда. «Космосысо оперын театрже» Д.Аллан).

Айдеме деч посна?

Такшым пӱртӱслӧ огыл уш-акыл (искусственный интеллект) шкеак сӱретла манаш лиеш мо? Вет сӱрет лекше манын, ончыч саде виртуальный «сӱретчетлан» текстым возыман. Ямде текстлан кӧра программе але марте ыштыме шуко тӱжем дене сӱрет ден фото-влакым тӱрлӧ кырча-марчаге шергал лектеш, радамла, шымла, ойыркала. Вара иже негызлан погымо информацийым сӱретыш чумыра. Чылажат лӱмын келыштарыме программе полшымо дене ышталтеш да тидым, мутат уке, айдеме ышта.

Фотошто: Марий Элысе эҥер-влакым айдеме семын ончыкташ йодмылан шке ыштыме интеллект теве тыгай сӱрет-шамычым ямдылен.

Палемдыме шуэш, пӱртӱслӧ огыл уш-акыл возымым сӱретыш савырен гына огыл, а сӱрет негызеш текстымат возен кертеш. Тыге кӱчык ойлымашат, кугу сылнымут произведеният шочыт. Кокланже тыгай сылнымут пашам айдеме возен огыл манын отат шоналте, чылажат йылмысе правил дене келыштаралтеш, турлӧ сылнымут йӧн дене сӧрастаралтеш. Но негызше  – адакат тылеч ончыч да але марте возымаш. Айдемын возымыжо.

Кеч-мо гынат, илышыштына АЛА-КӦ огыл, а АЛА-МО мемнан семын чыла ыштен мошта але тунемеш манын шоналтет да чонлан ньыге-нюго чучеш, тыге? Тугеже ала тиде лыпландара: пӱртӱслӧ огыл уш-акылым (искуссвенный интелектым) айдеме шонен луктын, айдемак тудын пашажым эскера. Кызытеш эше тыге…