Илыш «пазлым»погаш путешествий полша
Шукерте огыл ик пайремыште Света палыме лийым. Сайын мутланен ышна шукто гынат, ятыр вере ужын-коштмыжым пален нальым. Моло йодышлан вашмутым интервью годым рашемдем, шоналтышым…
– Икымше гана кунам да кушко миен коштынат?
– Тиде 2012 ийыште лийын. Нылымше курсышто производственный практике лийшаш ыле. Международный программе дене ныл тылзылан Лейпциг олаш колтат улмаш. Тидлан немыч йылмым палаш кӱлын. А мый школышто да университетыште икымше-кокымшо курсышто англичан йылмым тунемынам. Сандене кумшо курс гыч репетитор дене заниматленам.
4 курсышто тиде программыш логалаш манын, кок ужашан тергымаш лийын. 15 еҥ гыч визытын веле эртенна.
2012 ий апрель мучаште Германийыш каенна.
Пел ийыште шуко оҥайым ужынам. Каныш жапым пайдалын эртаренна, вес олалаш кудалыштынна.
–Тылеч вара чон адак иктаж вере каяш ӱжын?
– 2014 ийыште Германийыш вес международный программе дене ешыш йочам ончаш каенам. Ик ий контракт дене пашам ыштенам. Тиде пагытыште, каныш годым, 14-15 элыш миенам.
– Шукерте огыл эше ик оҥай верыште лийынат. Тидын нерген Интернет лаштыкыштет палемдыме ыле.
– Шукерте огыл Пермь кундем Усьва эҥер дене сплавыш миенна. 10-12 еҥ чумыргенна. Тиде путешествийым мыйын сай йолташем эртара – Олег Патраков. Тудо кок ий утла тыгай каныш мероприятийыш еҥ-влакым пога.
Тыге лектын коштмеке, йӧршын у шижмаш шочеш. Тый палыдыме верыш логалат, шуко еҥым вашлият. Нунын шке тӱняумылымашышт, шонымашышт, чон поянлыкышт. Икманаш, вес илышым илет. Коклан айдемым книга семын лудашат логалеш, тунар оҥай улыт. Нунын шонымашыштым южгунам шкеат шарнет, эсогыл пайдале каҥаш семын кучылтат. Чыла тиде илыш «пазлым» погымаште ик изи ужаш.
Ӱдыр Кужэҥер район Ӱштымбал ялеш шочын-кушкын. Верысе школышто 1-9 класслаште шинчымашым поген. 10-11 класслам Кужэҥер посёлкысо кокымшо номеран школышто тунемын. МарГУ-што Аграрно-технологический институтышто «Технология производства и переработки сельскохозяйственных продукций»направлений дене тунем лектын. Тиде профессий дене кызыт Медведево посёлкысо «Лента» ужалыше рӱдерыште пекарне вуйлатышылан пашам ышта.
