Ешем – мыйын эҥертышем

Российын Президентше Владимир Владимирович Путин 2024 ийым Ешын идалыкше семын увертарен. Тудо ешым пеҥгыдемдаш, традицийым да тудын поянлыкшым аралаш ӱжын. Илышыште еш деч сайракше мо лийын кертеш? Ала…

Кеч-могай еҥат пиалан еш нерген, йӧратыме пӧрт нерген шона. Еш ден сурт. Нине умылымаш эн ондак йӧратымаш да тыршымаш дене кылдалтыныт. Еш кеч-могай еҥынат илышыштыже кугу рольым модеш. Еш – тиде айдемын эн кугу да пеҥгыде тӱҥ вожшо. Еш – тиде эн шерге еҥ-влак.

Мыят шке ешем дене кугешнем. Ме ешыште визытын улына: авам, ачам, ковам, мый да шольым. Чыланат келшен илена, икте-весылан полшена. Тыште ме шкенан нерген каласен кертына: нигунам икте-весынам огына мондо. Ешыште кугураклан ковам шотлалтеш. Тудо тамле кочкышым шолта, мемнам туныкта. Чыланат тудын мутшым колыштына. Ковам мылам каҥаш-влакым пуа, илышыште чын айдеме лияш туныкта. Тудо эре чын корным ончыкта. Ковамым мый пеш йӧратем!

Ачамым пошкудо-влак «шӧртньӧ кидан» маныт, тудо чыла сомыллан мастар. Тудо – эн сай ача! Жапыште воштыл мошта, мыскарам ышта, кӱлеш годым ойым пуа. Мыланна верч чыла ышташ ямде. Мый ачамым пеш йӧратем!

Авай — эн лишыл айдемына. Тудо поро, шыма, ласка. Авам мыйым вӱчкалта, ниялта, шыман гына ӧндалеш. Тыгай жапыште мый шкемым эн пиалан айдемылан шотлем. Кушко гына ом кай, авамын порылыкшо эре кӱдынем. Шольым дене когыньнам йӧрата, тунемаш полша, илышлан эре туныкта. Авамым мый пеш йӧратем!

Шольым кудымшо классыште тунемеш. Ме школыш пырля коштына. Яра жапыште модына, лудына, телевизорым ончена, ача-аваналан полшена. Шольымат мый йӧратем!

Пӧртыштына эре шокшо, ласка, весела, келшымаш озалана. Ме пырля У ийым вашлийына да моло пайремым пайремлена. Ешыште икте-весым саламлена. Арам огыл калыкмут тыге ойла: «Ешыште келшымаш озалана гын, пиал тушко корным муэш».

Мыйын ешем — мыйын поянлыкем, пиалем.