Эн мастар туныктышым ойырат
18-22 апрельыште республикыштына «Идалыкын туныктышыжо-2022», «Идалыкын воспитательже-2022» да «Марий йылмым эн сайын туныктышо-2022» конкурс-влак эртаралтыт. Тышке кундемнан тӱрлӧ школжо гыч туныктышо ден воспитатель-влак (чылаже 34 еҥ) шке паша мастарлыкышт дене палдарат. Конкурсым 18 апрельыште Медведево посёлкысо Тӱвыра полатыште пайремлын почмо.
Марий йылмым эн сай туныктышо лӱм верч 5 еҥ таҥаса. Участник-влак ончылгоч электронный портфолиом ыштеныт. Тылеч вара мастер-класс-влак эртаралтыныт. 19 апрельыште Оршанке район Кугунур школышто туныктышо-влак марий йылме урокым ончыктеныт. Финалыш Советский поселкысо 3-шо номеран школ гыч Роза Александровна Богомолова, Шернур район Кукнур школ гыч Ирина Леонидовна Михайлова да Волжский район Карай школ гыч Любовь Анатольевна Сергеева лектыныт. 20 апрельыште 9 финалист — туныктышо ден воспитатель-влак — Образований институтышто «йыргешке ӱстел» сынан конкурсышто таҥасат. Эн тале туныктышо ден воспитатель-влакын лӱмышт 22 апрельыште пале лиеш.
