Ӱдырамашын пиалже — ешыште
Морко район Шӱргӧ ялын ӱдыржӧ Наталия Алексеева 2015 ий годсек М.Шкетан лӱмеш Марий драмтеатрыште артисткылан пашам ышта. Тылеч посна ме тудым мурызо семынат палена. Марий эстраде аланыште Наталия шукертак шке вержым айлен, мурыжо-влаклан мутымат, семымат шкеак келыштара.
– Наташа, артист лияш изи годсек шоненат але ты корныш вучыдымын шогалынат?
– Артист да мурызо лияш изинек шоненам.1997-2008 ийлаште Унчо школышто тунемынам. Кугурак класслаште муро-влак шочаш тӱҥалыныт, но тидын нерген иктыланат ойлен омыл.
Школ деч вара парикмахер лияш шоненам, сандене Йошкар-Оласе технологический колледжыш тунемаш пуренам. Тиде жапыштак Палантай лӱмеш тӱвыра да сымыктыш колледжыш экзаменым сайын кученам.
Чонем театр деке шупшылын. 2008-2011 ийлаште Олег Геннадьевич Иркабаевын погымо театр усталык курсыштыжо тунемынам. Кумшо курс деч вара Щепкин лӱмеш кӱшыл театральный училищын актёрский факультетышкыже тунемаш пуренам. 2011-2015 ийлаште Москошто шинчымашым погенам.
2015 ий гыч Шкетан театрыште тыршем.
– Ик жап Марий Эл деч ӧрдыжтӧ иленат. Шочмо кундем гыч каяш мо таратен? Тушто эрелан кодаш шонымаш лийын?
– Пелашем Карелийыште контракт почеш службым эртен. Декрет жаплан мыят тушко каенам. Вес кундемыште илыме жапыште вуйышко тӱрлӧ шонымаш пурен. Но чон мӧҥгӧ шупшын, шочмо-кушмо мландыште сайрак.
– Ме палена, тый самырык ава улат, пелашет дене кок эргым ончен куштеда. Икшывет-влак але изирак улыт гынат, пашаш лектынат. Кузе чыла шуктет?
– Ныл ияш Матвей йочасадыш коштеш, идалыкаш Тимофейым пелашем дене черет дене ончена. Южгунам акамым йодам, а южгунам театрыш намием.
Кугурак эргым денат пашаш ондак лектынам. Тунам пел ияш Матвейым утларакшым авам ончаш полшен. Тӱрлӧ йӧным кычалаш пернен.
– Кок икшыван улат гынат, капкыл моторлык, чурий сылнылык дене вашталтын отыл, эре самырык ӱдыр гай коят. Моторлыкым эскерыме шотышто ала иктаж секретет уло?
– Тау. Секрет нимогаят уке. Шкендым йӧраташ кӱлеш да йӧратыме лияш. А тыгеже генетике дечат шуко шога.
Мый эр еда вӱдым йӱам, южгунам спорт дене кылым кучем: фитнес, ече, бассейн, куржталам. Ме кудымшо пачашыште илена. Тошкалтыш дене эре йолын кӱзем, лифт дене ом пайдалане. Тиде – эн сай фитнес. Йолын шуко коштам.
– Тый театрын сценыштыже гына огыл, тыгак эстрадыштат мастарлыкетым ончыктет. Мурым шкеак возет, шкеак мурет. Тиде хобби але тудым паша семын аклет. Мурым возаш неле?
– Мый тидым эн ондак Сандалыкын але Юмын пуымо пиаллан шотлем. Тиде Сандалык дене ала-могай ик частоташ логалме дене иктак. Тиде толкыныш логалам да мылам куштылгын тиде пуалтеш. Шомакым возымо годым ала-могай умылаш лийдыме вий пуйто шкежак виктарен шога, тӱрлӧ вариантым луктеш, вара иктыже, кудыжым чынлан шотлем, калык деке лектеш. Сем шотыштат тыгак, вуйыш толын перна южгунам. Мутлан, йӱдым ом ӧркане гын кынелаш, диктофоныш возем, уке гын, тыгак йомеш, эрдене ом шарне. Тыгайже шуко лийын. Мый ом ӧкынӧ. Шонем, шочшаш мурын корныжо виян – калык деке лекшаш гын, кеч-кузе да ташлен лектеш.
– Кузе шонет, мо тыгай ӱдырамаш пиал? Ӱдырамаш пиалан лийже манын, тудлан эн ончыч мо кӱлеш?
– Йӧратыме, аклыме, умылымо лияш. Тыйын йырет тыйым пагалыше, йӧратыше, аклыше да саклыше еҥ-влак лийыт гын, тый пиалан лият. Ӱдырамашын пиалже – ешыште, сай поро пелаш да йӧратыме икшыве-влак пелен.
