Цифровой сӱрет тӱняште

Илышыш пурышо тӱрлӧ у йӧн усталык пашамат у семын виктараш полша. Кызыт сӱретче я сӱретлаш йӧратыше-шамыч чон кумылыштым радына да чия полшымо дене веле огыл, тыгак цифровой йӧн денат почын пуэн кертыт.

Татьяна Антропова изиж годсек сӱретлаш йӧрата, но ойлымыж почеш, тудлан чон йодмо сомылжо эре модмаш семын веле чучын. Профессийымат ӱдыр вес сынаным налын, «Политехник» кӱшыл колледжыште «Технология машиностроения» направлений дене шинчымашым поген.
Иктаж кок ий ончыч Таня ик ӱдырын планшетеш ыштыме сӱретше-влакым ужын, тыге сӱретлен ончаш кумылжо лектын.
— Тӱҥалтышлан смартфонеш сӱретленам, вара — планшетеш. Икымше «заказ»-влак лекмеке, айпадым (iPad) нальым. Тылеч вара ме тудын дене ик кечыланат огына ойырло, чыла сӱретем ынде тушан шочеш, — каласкалыш Татьяна.

Ӱдыр ончыч утларакше портрет-влакым сӱретлен, кызыт тудын цифровой радыналаштыже тӱрлӧ оҥай фоным, янлык але арвер-шамычым ужаш лиеш.

Усталык пашаже Таням тыгак вес сомыллан кумылаҥден — кызыт ӱдыр капеш тату сӱретым ыштылаш тунемеш.

Фотом да сӱрет-влакым Т.Антропован архивше гыч налме.