Чылажат самырык тукымын кидыште!
8-13 июльышто Марий Турек район Сардаял ялыште XIV-ше Марий самырык тукым слёт эртаралтын.
Тушко Татарстан, Пошкырт, Одо, Киров да Угарман кундемла, Марий Элын тӱрлӧ районлаж гыч чолга марий ӱдыр-рвезе-влак погыненыт.
Россий кумдыкышто илыше марий самырык тукымым пырля ушышо слёт кузерак эртен? Ты шотышто «ВийАр» тӱвыра кокласе кыл ушем» мер организацийын вуйлатышыже, Марий самырык тукым слётын организаторжо Алена Иванова каласкалыш:
– Тенийысе слётна Российыште илыше калык-влакын тӱвыра поянлыкыштын идалыкшылан пӧлеклалтын. А девизше тыге йоҥга: «ЧЫЛАЖАТ — МЕМНАН КИДЫШТЕ». Программыште туныктыш да каныме, спорт программе лийыныт. Слёт вич кече шуйнен. Мом шонен пыштыме, кушечын да кӧм вашлияш, мо лиеш да кузе эрта — чылажат шот да радам дене эртен. Тидланже кугу таум каласыме шуэш организатор-влаклан да верысе калыклан, тора кундем гыч толшо йолташна-влаклан. Кужу корным эртен толыныт, мыланна полшеныт. Кеч-могай паша команде дене шукталтеш. Слётым ямдылыме да эртарен колтымо организационный йодыш-влакым илышыш пуртымо верч тыршыше Марий Эл Республикын тӱвыра, печать да калык-влакын пашашт шотышто министерствылан, Туныктыш да шанче министерствылан, Самырык-влакын политике, спорт да туризм министерствылан, Мер Каҥашлан, «ВийАр» тӱвыра кокласе кыл мер ушемлан, йоча-влакын «Эр Вий» — «Юная сила» ушемыштлан, Марий калык конгресслан да Марий Турек районлан тауштена! Кугу тау ЧЫЛАЛАН! Ончыкшымат идалык жапыште мемнам шуко пайдале да сай мероприятий вучат! Эскерен шогыза да лийза мемнан дене пырля!
Лиана Федорова, слётын участницыже (Татарстан):
– Слёт мылам моткоч келшен! Тыште финн-угор да марий калык нерген ятыр кӱлешан шинчымашым пуышт. Арт-студий поснак шарналт кодеш, тушто марий куштымашым тунемынна, мыланна марий калык муро да профессиональный муро шотышто каласкаленыт. Мастер-класс-влак оҥай улыт ыле. Марий сынан тӱлӧ аралтышым, шӱэш сакыме сӧрастарыше ӱзгарым, кидшолым ыштенна, тыгак курчак-влакым ышташ тунемна. Марий модыш-влак дене модна, тыге йоча годсо модышымат шарналтышна, у модышымат пален нална.
Дмитрий Капитонов (Киров область):
– Марий самырык тукым слётыш мый икымше гана толынам. Киров кундем Уржум районын чапшым аралем. Чылажат моткоч келшен. Тыште лияш шукертак шоненам, ты гана йӧн лектын. Слётыш толмо амал: шочмо йылме дене шукырак мутланаш, чолга самырык еҥ-влак дене вашлийын, нуным ончен, марий тӱвырам да йылмым шке кундемыштат вияҥдаш. Мутат уке, чолга ӱдыр-рвезе-влак дене палыме лийынам да шуко ум пален налынам.
Екатерина Мамаева (Марий Эл):
– Слетыш кокымшо гана толынам. Атмосфер тыште шкешотан, ойыртемалтше. Икымше кечын ме, самырык-влак, ваш-ваш огына пале, вожылына. Ик еш семын илымеке, пытартыш кечын ойырлен кайыме огеш шу, тынар чот пырля ушненна.
