«Чонем садак авай пелен», —
манеш Алина Макарова, кызыт ынде Семенова.
Шукерте огыл интернет-лаштыкыштыже у мурылан войзымо клипше дене палдарыш. Кӧ ужын шуктен огыл, ончалын кертыда. А мыйын мурызылан шуко йодышем погынен:
– Алина, кунам да кузе «Чонем садак авай пелен» муро шочын?
– Клипысе сюжет-влак чылт илыш гыч улыт. Малаш вочмо годым але тыглай сото телефонышто фото-влакым ончымо годым тӱрлӧ шонымаш, шарнымаш ушыш толын пурат. «Чонем садак авай пелен» почеламут лач шарнымаш гыч шочын.
Кодшо ийын пелашем да икшывына-влак дене Марий Элыш отпускыш толынна ыле (авт.Ондак Семеновмыт еш Курил отрошто иленыт). Корнышто улмо годым кеҥеж пагыт, мӧрым погымо жап, авай деке унала толмо сӱрет ушыш возын.
Мӧҥгеш кайыме годым почеламут корныла шочыныт, а телым уэш отпускыш толмекна, пелашем дене Станислав Устюгов деке мурым возаш миенна. Мутым мый Стаслан ончылгоч колтенам ыле, тудо огнчылгоч семым келыштарен.
Мурым возымо годым ик томаша лийын каен: семлан почеламут корныла ситен огытыл, сандене студийыштак ешарен возаш логале.
Тений кеҥежым клипым ты мурылан войзаш шоненам. Линда Кузнецова дене фотосессий шот дене вашлийынна ыле. Йошкар-Олаште кидмастар Надежда Акиеван вургемжым чиен, фотом ыштенна, а вара клипым ышташ пижна.
Илыш мыйым тыгай творческий шӱлышан айдеме дене палымым ыштен гын, кузе тыгай йӧн дене пайдаланаш огыл. Клипын могай лийшашыжым ме вашке умыленна. Авам, шочмо кундемын пӱртӱсшӧ, пачер гыч икмыняр кадр да икшыве-влак видеошто лийшаш улыт.
– Тиде тыйын икмыше клипет огыл. Клипым ямдылымаште мо эн чот келша да мо кумылым волта?
– Тиде мыйын икымше клипем манаш лиеш, докан. Но! Студент пагытыште Дмитрий Калягин дене пырля «Ялем-ялем» клипым ямдыленна. Тушто мый припевым йоҥгалтаренам.
Клипым ямдылыме паша моткоч оҥай. Тиде шкешотан изи илыш: кузе, мом, кушто ыштыман, мом чийыман, могай верыште войзыман, шонет.
Но тиде ямле тамын кочыжат уло: клипым ямдылыме пагытыште чотак шокшо игече шоген, сандене макияж шокшылан кӧра вашталтын, ӱп товаҥын. Чыла тидым уэш ятыр гана тӧрлаш логалын. Тыгак икшывем-влак дене сюжет уло. Кузе нуно тиде пагытым чытен лектыныт, ӧрам! Тыгай чытышан улыт манын шонен омыл.
–Тыйым шукертак кугу сценыште она уж, кеч кеҥежым шочмо кундемыштет калыкым сцене гыч куандаренат. У муро лектын гын, тыйым кугу концертыште кунам вучыман?
– Ты йодышлан мыйын тачат вашмутем уке. Ме кызыт Озаҥ олаште илена, сандене Йошкар-Ола артист-влак дене кылем начаррак. Кеч икмыняр гана командыш ушнаш темлымаш пурен ыле. Адакшым йочам-влак изирак улыт, нуным нигӧ дене кодаш.
– Кызыт шукын альбом дене мурым луктыт. Тыйын тыгай шонымаш лийын огыл?
– Тыгай шонымаш шукертак уло. Но тидлан адак кугу амал лийшаш, ала-могай вий-куат шӱкышаш, шонем. Кызытеш икмыняр почеламутат шке жапшым вуча. Стас Устюгов денат нуным ончен лектынна. Жап шумеке, нунымат калыклан аклаш луктам.
– Озаҥ олаште илена манын ойлышыч. А шочмо кундемышкет чӱчкыдын коштат?
–Тыге, ынде икшывем-шамыч дене Озаҥ олаште илена. Нуно йочасадыш коштыт, сандене шочмо кундемыш каныш кечын веле миен толаш йӧн лектеш. Но тунамжат эре миен она шу, корно лишылжак огыл.
А мый Алиналан умбакыжат творчество аланыште шке мастарлыкшым тергаш тыланем. Ӱшанем, эше ятыр муро, клип, почеламут-влак дене Алина мемнам куандара!
