Чолга да чулым Зинуш
Пытартыш жапыште тӱрлӧ районлаште эртаралтше спорт таҥасымаш фотошто эре ик палыме чурийым ужам. Тиде Морко район Унчо ӱдыр – Зинаида Якимова.
Ӱдыр йоча годсек спорт дене кылым куча.
– Изирак годым изам-влак кумылаҥденыт гын, кугурак лиймекем физкультурым туныктышо – Светлана Даниловна Пайгашева.
Школ пагытыштак тӱрлӧ таҥасымашыш коштынна да умбакыже тиде пашам шуэна,- каласкалыш Зинуш.
Спортсменке кажне кечын спортлан жапым ойыра: эрдене зарядкым ышта, кастене пӱртӱс лоҥгаште куржталеш. Южгунам эрденат куржталаш лектеш. Кечеш 12 меҥгым эрташак тырша. Тӱҥ шотышто кужу дистанцийым куржаш йӧрата.
– Медаль ден грамотет шотлет мо?
– Уке, чотым ом кучо. Ынде ятыр погынен. Чӱчкыдын шке кундемысе да пошкудо районлаште эртаралтше соревнованийыш коштам. Тыгак Йошкар-Олаште да Озаҥ олаште лийынам. Лач тушеч чап кагаз-влак улыт. Таҥасымашыш кайыме годым тыге ойлена: «Главное — участие, а не победа, вместе времяпровождение, весело и от души!»
–Лудшына-шамычлан могай тыланымашет лиеш?
– Тыланем чылалан пеҥгыде тазалыкым, нимучашдыме пиалым. Тазалыкдам эреак пеҥгыдемден шогыза, аралыза! Пӱртӱс лоҥгаште шукырак жапым эртарыза! Кумылда лийже эре весела!Таза лияш кӱлеш эн ондак шкаланет, а вара чыланыштлан да чылажланат!Тыгак шукерте огыл ик таҥасымаште ӱдыр-влак шагал улыт, маньыч. Тек ӱдыр-рвезе-шамыч спортлан шӱман лийыт.
