Шукерте огыл, тӱшка увер йӧн дене пайдаланен,  ик оҥай материалым лудынам. Чонем тарватен: шонкалаш, шыдешкаш кумылым луктын. Мыят шке эскерымем луктын пыштынем.

Самырык-влакын кугуракым пагалыме, аклыме шотышт уке, эсогыл транспортышто верымат огыт пу манын лудмеке, тидым эскераш тӱҥальым.

Кеч троллейбус, автобус дене ом пайдалане гынат, коклан пелашын пашаште улмыж годым йоча-шамыч дене иктаж вере миен толаш логалеш. Мутлан, Медведево посёлкысо зоопаркыш але «Унагудо» интернет-журналын вияш эфирышкыже. Кӧ эфирым кеҥежым ончен гын, пала, кузе экран вес могырышто 4-6 йоча эре модын коштын. Шукыж годым тӱшка транспорт дене тушко миен шуаш логалын.

Могай сӱретым ме ужына?

Траспортышто тӱрлӧ ийготан еҥ-влак улыт. Но нигӧ верым пуаш ок вашке. Тыге мый, кок-кум ияш йочам дене, да коллегем Надя кум икшывыж дене (иктыже пел ияш) шогенак Медведево пӧселкыш миен шуна.

Уке, ме нигӧмат она титакле. Лачак шотыш налаш йодына, кунам иктажшым вурсена, шке койышнамат ончалаш уто ок лий. Мӱшкыран але икшыван ӱдырамашлан верым пуэна мо? Йочанам, уныкана-влакым туныктена, примерым ончыктена мо?

Вет кажне гана тыге шоген кайыме годым шинчыше радамыште кокла ийготан ӱдырамаш шинча. Тыгодым  иктат ны полшаш, ны верым пуаш ок вашке. Но иктаж-кӧм шудалаш  тыманмеш вашкат.

Айста, ондак шке ӱмбакына ончалына, порырак лийына да молылан полшена.